Dünya səhnəsində əbədiləşən Azərbaycan səsi

Faktum.az xəbər verir ki, avqustun 17-də dünya şöhrətli müğənni və bəstəkar, SSRİ Xalq artisti Müslüm Maqomayevin anadan olmasından növbəti il keçir. Unikal bariton səsi, yüksək səhnə mədəniyyəti və bənzərsiz artistizmi ilə milyonlarla dinləyicinin qəlbini fəth edən sənətkar, XX əsr musiqi tarixinin ən parlaq şəxsiyyətlərindən biri kimi qəbul edilir.

Klassik opera aryalarından estradanın ən populyar mahnılarınadək geniş diapazonda əsərlər ifa edən Müslüm Maqomayev, cəmi 31 yaşında SSRİ Xalq artisti fəxri adına layiq görülərək bu sahədə rekord müddətə imza atıb. O, İtaliyanın məşhur La Skala teatrında təcrübə keçərək vokal sənətinin sirrinə dərindən yiyələnib və Azərbaycan musiqisini dünya miqyasında layiqincə təmsil edib. Bəstəkar kimi də böyük irs qoyub ketən sənətkarın “Azərbaycan” mahnısı, eləcə də kinofilmlərə və teatr tamaşalarına bəstələdiyi musiqilər milli mədəniyyətimizin qızıl fonduna daxil olub.

Müslüm Maqomayevin sənəti həm Azərbaycanda, həm də ölkə hüdudlarından kənarda hər zaman yüksək qiymətləndirilib və dövlət təltiflərinə layiq görülüb. Bu gün əvəzsiz sənətkarın xatirəsi ölkəmizdə böyük ehtiramla yad edilir, onun zəngin musiqi irsi gənc nəsillər üçün ilham mənbəyi olaraq qalır.