Qədim Yunan teatrı: Tragediya və komediyanın doğulduğu yer

Faktum.az xəbər verir ki, müasir incəsənətin və səhnə mədəniyyətinin təməlləri E.ə. VI əsrdə Qədim Yunanıstanda, xüsusən də Afinada qoyulmuşdur.

Şərab və bolluq tanrısı Dionisin şərəfinə keçirilən dini festivallardan başlanğıc götürən bu ənənə, qısa müddətdə dünya ədəbiyyatını və mədəniyyətini dəyişdirən böyük bir sənət növünə çevrildi. Qədim Yunan teatrı iki ana janrın – insanın taleyi, əxlaqı və ilahi ədalətlə mübarizəsini əks etdirən tragediya (Eshil, Sofokl, Evripid) və cəmiyyətin, siyasətçilərin nöqsanlarını satira ilə ifşa edən komediya (Aristofan) janrlarının doğulduğu yerdir.

Yalnız kişilərin aktyorluq etdiyi və geniş amfiteatrlarda minlərlə tamaşaçının izlədiyi bu tamaşalarda emosiyaları təsvir etmək üçün xüsusi maskalardan istifadə olunurdu. Bu gün bütün dünyada teatrın rəsmi simvolu hesab edilən “gülən və ağlayan maskalar” məhz Qədim Yunanıstanın tragediya və komediya irsinin əbədi xatirəsidir.