Beynəlxalq Jurnalist Həmrəyliyi Günü

Mətbuat azadlığı və peşəkar həmrəylik

Faktum.az xəbər verir ki, 1958-ci ildə Buxarestdə keçirilən Beynəlxalq Jurnalistlər Təşkilatının 4-cü konqresində qəbul edilən qərarla hər il sentyabrın 8-i Beynəlxalq Jurnalist Həmrəyliyi Günü kimi qeyd olunur. Bu tarixin seçilməsi təsadüfi olmayıb, 1943-cü il sentyabrın 8-də Berlinin Plötzensee həbsxanasında faşistlər tərəfindən edam edilən çexoslovakiyalı anti-faşist jurnalist, yazıçı və ictimai xadim Yulius Fuçikin xatirəsi ilə bağlıdır. Həbsxanada olduğu müddətdə gizlicə qələmə aldığı və ölümündən sonra nəşr edilən “Dar ağacından reportaj” kitabı mətbuat fədakarlağının və azadlıq mübarizəsinin rəmzinə çevrilmişdir.

Bu günün əsas məqsədi bütün dünyada jurnalistlərin öz peşə fəaliyyətlərini həyata keçirərkən qarşılaşdıqları təhlükələrə diqqət çəkmək, onların hüquqlarını qorumaq və informasiya azadlığı uğrunda həmrəylik nümayiş etdirməkdir. Müasir dövrdə münaqişə zonalarından, böhran nöqtələrindən obyektiv xəbər çatdıran mətbuat işçiləri hələ də təzyiq, həbs və fiziki təhlükələrlə üz-üzə qalırlar. Beynəlxalq Jurnalist Həmrəyliyi Günü həqiqəti cəmiyyətə çatdırmaq üçün canından keçən mətbuat fədailərinin anılması və peşə prinsiplərinin müdafiəsi baxımından müstəsna əhəmiyyət kəsb edir.