Vergi systemsinin əsas prinsipləri açıqlandı: Ziddiyyətli məqamlar ödəyicinin xeyrinə şərh ediləcək

Azərbaycan Respublikası Vergi Məcəlləsinin 3-cü maddəsi ölkənin vergi sisteminin əsas prinsiplərini, ədalətlilik, şəffaflıq və sahibkarlığın müdafiəsi standartlarını tənzimləyir.

Faktum.az xəbər verir ki, bu maddəyə əsasən, ölkədə tətbiq edilən vergilər iqtisadi cəhətdən əsaslandırılmalı, ümumi, bərabər və ədalətli olmalıdır. Vergi sistemi vətəndaşların konstitusiya hüquqlarına mane olmamalı, ölkənin vahid iqtisadi məkanını pozmamalı və malların, xidmətlərin yaxud pul vəsaitlərinin sərbəst hərəkətinə süni maneələr yaratmamalıdır.

Eyni gəlirdən və ya obyektdən bir dəfədən artıq vergi tutula bilməz (ikiqat vergitutmanın qadağası). Vergilərin müəyyən edilməsində siyasi, etnik, dini və ya digər ayrı-seçkiliyə (diskriminasiyaya) yol verilmir, lakin mülkiyyət formasına, vətəndaşlığa və ya kapitalın mənşəyinə görə differensial vergi dərəcələri tətbiq oluna bilər.

Şəxslərin üzərinə yalnız Vergi Məcəlləsi ilə nəzərdə tutulmuş vergi öhdəlikləri qoyula bilər və bu Məcəllədən kənar vergi ödənişi tələb oluna bilməz. Vergi qanunvericiliyi tam aydın, dürüst formalaşdırılmalı, vergi ödəyicilərinin hüquqi aktlarla sərbəst tanışlıq imkanı təmin edilməli və vergi sistemi investisiya, sahibkarlıq fəaliyyətini həvəsləndirməlidir. Ən mühüm prinsiplərdən biri kimi, vergi qanunvericiliyində ortaya çıxan bütün aydın olmayan məqamlar, ikili mənalar və ziddiyyətlər birbaşa vergi ödəyicisinin xeyrinə şərh olunmalıdır.