Laçın rayonunun enerji potensialı
Laçın rayonunun enerji potensialı
Laçında yaradılan enerji infrastrukturu rayonun bərpası və əhalinin doğma torpaqlarına qayıdışı prosesinə dəstək verir. Yeni yaşayış məntəqələrinin, məktəblərin, tibb müəssisələrinin və digər sosial obyektlərin normal fəaliyyəti üçün davamlı elektrik enerjisi vacibdir. Bu baxımdan su elektrik stansiyalarının istifadəyə verilməsi yalnız enerji layihəsi deyil, həm də rayonun sosial inkişafını sürətləndirən mühüm amil kimi qiymətləndirilə bilər. Laçının hidroenerji potensialından səmərəli istifadə olunması Azərbaycanın enerji təhlükəsizliyinin möhkəmləndirilməsinə də töhfə verir. Rayonda istehsal olunan artıq enerjinin ölkənin enerji sisteminə ötürülməsi ümumi enerji balansının yaxşılaşdırılmasına imkan yaradır. Eyni zamanda, bərpa olunan enerji mənbələrinin payının artırılması ölkənin ənənəvi enerji resurslarından asılılığının azalmasına və enerji sisteminin daha dayanıqlı olmasına şərait yaradır. Su elektrik stansiyalarının əsas üstünlüyü onların bərpa olunan enerji mənbəyinə əsaslanmasıdır. Bu stansiyalar ənənəvi yanacaq sərfiyyatını azaltmağa, təbii qaza qənaət etməyə və atmosferə atılan karbon emissiyalarının həcmini aşağı salmağa imkan verir. Bu baxımdan Laçında həyata keçirilən layihələr Azərbaycanın bərpa olunan enerji mənbələrinin inkişaf etdirilməsi və “yaşıl enerji”yə keçid siyasəti ilə uyğunluq təşkil edir.
Enerji infrastrukturunun inkişafı Laçının sosial-iqtisadi bərpasına da müsbət təsir göstərir. Yeni yaşayış məntəqələrinin, məktəblərin, tibb müəssisələrinin, turizm obyektlərinin və digər sosial-iqtisadi infrastrukturların fəaliyyət göstərməsi üçün sabit elektrik enerjisi vacibdir. Buna görə də su elektrik stansiyalarının yaradılması rayonun yalnız enerji təminatını deyil, ümumi inkişafını da dəstəkləyir. Nəticə olaraq, Laçın rayonu Azərbaycanın hidroenerji potensialından səmərəli istifadə olunan əsas ərazilərdən birinə çevrilir. Güləbird SES-dən başlayaraq “Mişni”, “Alxaslı”, “Zabux”, “Qarıqışlaq”, “Aşağı Malıbəyli”, “Mirik”, “Ağbulaq-1”, “Ağbulaq-2” və “Şeylanlı” stansiyalarının istifadəyə verilməsi rayonun enerji imkanlarını əhəmiyyətli dərəcədə artırmışdır. Hazırda rayonun elektrik tələbatının tamamilə yaşıl enerji hesabına qarşılanması və artıq enerjinin ölkənin enerji sisteminə ötürülməsi Laçının enerji sahəsində əldə etdiyi mühüm nəticələrdəndir. Mövcud və tikintisi davam edən layihələr nəzərə alındıqda, Laçının gələcəkdə də elektrik enerjisinə olan tələbatını əsasən bərpa olunan enerji hesabına ödəməsi gözlənilir. Beləliklə, Laçın həm öz enerji təhlükəsizliyini təmin edən, həm də Azərbaycanın ümumi enerji sisteminə yaşıl enerji verən mühüm rayonlardan biri kimi formalaşır.
Veteran müəllim Etibar Niftəliyev