Parlamentlərarası əlaqələr inkişaf edir
Parlamentlərarası əlaqələr inkişaf edir.
Azərbaycan müstəqillik dövründə əldə etdiyi siyasi, iqtisadi və sosial nailiyyətlərlə beynəlxalq aləmdə mövqelərini möhkəmləndirib, dövlət quruculuğu prosesini ardıcıl şəkildə davam etdirərək müasir inkişaf modelini formalaşdırıb. Ölkəmizdə həyata keçirilən genişmiqyaslı islahatlar, iqtisadiyyatın şaxələndirilməsi, infrastrukturun yenilənməsi və insan kapitalının inkişafına yönələn tədbirlər Azərbaycanın tərəqqisinə mühüm töhfə verir. Bu inkişafın mühüm istiqamətlərindən biri də xarici siyasətin genişləndirilməsi, müxtəlif dövlətlərlə qarşılıqlı hörmət və etimada əsaslanan əlaqələrin qurulmasıdır. Azərbaycan beynəlxalq təşkilatlarda fəal iştirakı, siyasi dialoqa verdiyi önəm və tərəfdaşlıq münasibətlərinin möhkəmləndirilməsi ilə regional və qlobal əməkdaşlıq proseslərində öz rolunu artırır.
Ölkəmizin beynəlxalq münasibətlər sistemində qazandığı mövqe dövlətlərarası əlaqələrin müxtəlif istiqamətlər üzrə inkişafına da əlverişli şərait yaradır. İkitərəfli münasibətlərin möhkəmləndirilməsi, iqtisadi və humanitar əməkdaşlığın genişləndirilməsi ilə yanaşı, parlament diplomatiyasının inkişafı Azərbaycanın xarici siyasətində xüsusi əhəmiyyət daşıyır. Qanunverici orqanlar arasında təmaslar dövlətlər arasında qarşılıqlı anlaşmanın dərinləşməsinə, qanunvericilik sahəsində təcrübə mübadiləsinə və beynəlxalq məsələlər üzrə fikir mübadiləsinin genişlənməsinə xidmət edir. Bu baxımdan Azərbaycanın Asiya ölkələri ilə, o cümlədən Laos Xalq Demokratik Respublikası ilə əlaqələrinin inkişafı mühüm əhəmiyyət kəsb edir.
Cənab Prezident İlham Əliyevin oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri zamanı mətbuata bəyanatında parlamentlərarası əlaqələrə xüsusi diqqət yetirməsi bu sahənin ikitərəfli münasibətlərdəki yerini aydın şəkildə göstərir. Dövlət başçısı Azərbaycan ilə Laos arasında siyasi əlaqələrin uzun illərdir uğurla inkişaf etdiyini, parlamentlərarası əməkdaşlığın da bu münasibətlərin mühüm tərkib hissəsinə çevrildiyini vurğulayıb. Hər iki ölkənin parlamentində dostluq qruplarının yaradılması, beynəlxalq parlament təşkilatları çərçivəsində əməkdaşlıq və ikitərəfli təmasların davam etdirilməsi əlaqələrin institusional əsaslarını möhkəmləndirir.
Azərbaycan ilə Laos arasında diplomatik münasibətlər otuz ildən artıq tarixə malikdir. Bu müddət ərzində iki ölkə beynəlxalq təşkilatlar çərçivəsində həmrəylik və qarşılıqlı dəstək nümayiş etdirib, siyasi dialoqun davamlılığını qoruyub. Parlamentlərarası münasibətlərin inkişafı da məhz bu əməkdaşlıq ənənəsinin məntiqi davamıdır. Qanunverici orqanlar arasında qarşılıqlı səfərlər, görüşlər və təcrübə mübadiləsi ikitərəfli münasibətlərin gündəliyini zənginləşdirərək yeni əməkdaşlıq istiqamətlərinin müəyyənləşdirilməsinə kömək edir.
Laos Prezidentinin Azərbaycana ilk rəsmi səfəri münasibətlərin daha da genişləndirilməsi baxımından əlamətdar hadisədir. Səfər çərçivəsində Prezident İlham Əliyevlə keçirilən görüşlərdə ikitərəfli əlaqələrin mövcud vəziyyəti və gələcək inkişaf perspektivləri müzakirə olunub, əməkdaşlığın əsas istiqamətlərini müəyyənləşdirən Birgə Bəyanat qəbul edilib və bir sıra sənədlər imzalanıb.
Parlamentlərarası əlaqələrin əhəmiyyəti yalnız rəsmi görüşlər və diplomatik təmaslarla məhdudlaşmır. Bu əməkdaşlıq ölkələrin qanunvericilik təcrübəsinin öyrənilməsi, beynəlxalq hüquq normalarına dair fikir mübadiləsi, parlamentlərarası təşkilatlarda qarşılıqlı dəstəyin gücləndirilməsi baxımından da əhəmiyyətlidir. Eyni zamanda, dostluq qruplarının fəaliyyəti iki ölkənin parlament üzvləri arasında birbaşa dialoqun qurulmasına, qarşılıqlı maraqların müəyyənləşdirilməsinə və əlaqələrin davamlılığının təmin olunmasına kömək edir.
Rüxsarə Eminova – Zərdab rayonu Körpükənd kənd tam orta ümumitəhsil məktəbinin direktoru