Maddə 2. Azərbaycan Respublikasının vergi qanunvericiliyi

Azərbaycan Respublikası Vergi Məcəlləsinin 2-ci maddəsi ölkədə vergi hüququnun hansı mənbələrə əsaslandığını, digər qanunvericilik aktları ilə münasibətini və istisna hallarını tənzimləyir.

Faktum.az xəbər verir ki, bu maddəyə əsasən, vergi qanunvericiliyi Ölkə Konstitusiyasına və birbaşa Vergi Məcəlləsinə dayanır.

Vergitutma və vergi nəzarəti məsələlərində Vergi Məcəlləsi ilə digər sahayə aid qanunlar arasında ziddiyyət yarandıqda, hər zaman Vergi Məcəlləsinin müddəaları üstün tutulur və tətbiq olunur. Vergi azadolmaları, güzəştləri və azad olunma şərtləri yalnız Vergi Məcəlləsi ilə müəyyən edilə bilər, başqa normativ hüquqi aktlarla fərdi vergi güzəşti verilə bilməz.

Vergitutma müddəaları başqa sahəvi qanunlara daxil edilə bilməz; lakin Cinayət və İnzibati Xətalar Məcəlləsindəki vergi xətaları, müflisləşmə, büdcə sistemi, Hasilatın Pay Bölgüsü (PSA) və neft-qaz sazişləri, eləcə də Ələt Azad İqtisadi Zonası haqqında qanunlar bu tələbdən istisna təşkil edir. Azərbaycanın tərəfdar çıxdığı beynəlxalq müqavilələr yerli qanunvericilikdən üstün hüquqi qüvvəyə malikdir, lakin bu müqavilələrdən və ikiqat vergitutmanın aradan qaldırılması sazişlərindən vergidən yayınma məqsədilə sui-istifadə halları aşkar edilərsə, beynəlxalq güzəştlər ləğv edilir və milli Vergi Məcəlləsi tətbiq olunur.

Bundan əlavə, icra hakimiyyəti orqanları vergi güzəştlərinin və siyasətinin effektivliyini qiymətləndirərək hər il mayın 15-dək Milli Məclisə rəsmi arayış təqdim etməlidir.