Kosmosun sirli qapıları sayılan “Ağ dəliklər” qara dəliklərin tam əksidir

Faktum.az  xəbər verir ki, müasir astrofizikanın və kosmoloji nəzəriyyələrin ən ağlasığmaz fərziyyələrindən biri olan “Ağ dəliklər” qara dəliklərin tam əksi olaraq, içine heç nəyi buraxmayan, yalnız daxilindəki maddə və enerjini xaricə püskürən sirli kosmik qapılardır.

Albert Eynşteynin Ümumi Nisbilik nəzəriyyəsinin riyazi tənliklərindən doğan bu hipotetik obyektlər kainatın ən böyük tapmacalarından biri hesab olunur. Əgər qara dəlik elə bir cazibə qüvvəsinə malikdir ki, ora düşən hər şey, hətta işıq belə geri qayıda bilmirsə, ağ dəliklərin sərhəddindən içəri heç bir maddə sızmağı bacarmır. Onlar yalnız daxildən xaricə doğru nəhəng bir kosmik püskürmə həyata keçirirlər.

Bəzi fiziklər iddia edirlər ki, ağ dəliklər qara dəliklərin zaman daxilindəki tərs variantıdır və ya kainatın tamamilə başqa bir nöqtəsinə açılan “soxulcan dəliklərinin” (wormholes) çıxış qapısıdır. Bu nəzəriyyəyə görə, qara dəliyin udduğu bütün maddə və enerji digər tərəfdəki ağ dəlik vasitəsilə kosmosa yenidən buraxılır. Hələlik kosmosun dərinliklərində rəsmi olaraq heç bir ağ dəlik kəşf edilməsə də, bu fərziyyə kainatın təkcə başlanğıcı və sonunu deyil, həm də zaman və məkanın sərhədlərini anlamaq üçün elm dünyasına yeni üfüqlər açır.