Füzuli rayonunun yeni inkişaf dövrü
Füzuli rayonunun yeni inkişaf dövrü
Azərbaycanın qədim yaşayış məskənlərindən biri olan Füzuli bu gün yeni inkişaf və quruculuq mərhələsini yaşayır. Uzun illər işğal altında qalan, ağır dağıntılara məruz qalan bu torpaqda indi yeni evlər tikilir, yollar salınır, sosial infrastruktur yenilənir və insanların doğma yurda qayıdışı üçün şərait yaradılır. 17 Oktyabr – Füzuli Şəhəri Günü xalqımızın yaddaşında azadlığın, qələbənin və yenidən dirçəlişin rəmzi kimi yaşayır. Füzuli rayonu 1993-cü ildə Ermənistanın hərbi təcavüzü nəticəsində işğala məruz qalıb. Rayonun böyük hissəsinin işğal edilməsi minlərlə insanın doğma yurdunu tərk etməsinə səbəb olub. Uzun illər məcburi köçkün həyatı yaşayan füzulililər öz evlərinə qayıtmaq arzusu ilə yaşayıblar.
2020-ci il sentyabrın 27-də başlayan Vətən müharibəsi Azərbaycanın ərazi bütövlüyünün bərpasında tarixi mərhələ oldu. Azərbaycan Ordusunun qəhrəmanlığı və fədakarlığı nəticəsində Füzuli şəhəri 2020-ci il oktyabrın 17-də işğaldan azad edildi. Bu xəbər ölkəmizin hər yerində böyük sevinc hissi ilə qarşılandı. Füzulinin azad olunması şəhərin gələcək inkişafı üçün yeni imkanlar yaratdı. Qarşıda duran əsas vəzifə dağıdılmış yaşayış məntəqələrini bərpa etmək, müasir infrastruktur yaratmaq və insanların doğma torpaqlarında rahat yaşamasını təmin etmək idi.
Bu gün Füzulidə aparılan bərpa və yenidənqurma işləri rayonun simasını dəyişir. Şəhərdə müasir yaşayış binaları, yollar, təhsil və digər sosial təyinatlı obyektlər inşa edilir. Yeni infrastrukturun yaradılması əhalinin həyat şəraitinin yaxşılaşdırılmasına və bölgənin iqtisadi fəallığının artırılmasına xidmət edir. Quruculuq işlərinin əsas məqsədi Füzulini müasir, rahat və dayanıqlı inkişaf edən yaşayış məkanına çevirməkdir. Burada insanların yaşayışı üçün zəruri şəraitin yaradılması, kommunal xidmətlərin bərpası və ictimai obyektlərin istifadəyə verilməsi mühüm əhəmiyyət daşıyır. Yeni yaşayış məntəqələrinin salınması və infrastrukturun yenilənməsi Füzulinin gələcək inkişafına möhkəm zəmin yaradır. Bu proses rayonun təkcə fiziki görünüşünü deyil, həm də sosial və iqtisadi həyatını yenidən formalaşdırır.
Füzuli rayonu münbit torpaqları və kənd təsərrüfatı üçün əlverişli təbii şəraiti ilə seçilir. Rayonun iqtisadi potensialının bərpasında əkinçilik, heyvandarlıq və digər təsərrüfat sahələrinin inkişafı mühüm yer tutur. İşğaldan azad edilmiş ərazilərdə torpaqların yenidən istifadəyə verilməsi, suvarma sistemlərinin bərpası və müasir kənd təsərrüfatı üsullarının tətbiqi istehsal imkanlarını genişləndirə bilər. Bu sahədə görülən işlər yerli əhalinin məşğulluğunun artırılmasına və rayonun iqtisadi həyatının canlanmasına xidmət edir. Füzulinin inkişafı yalnız yeni binaların tikilməsi və yolların salınması ilə ölçülmür. Ən mühüm məsələ uzun illər doğma torpaqlarından ayrı düşmüş insanların öz evlərinə qayıtması və burada təhlükəsiz, firavan həyat qurmasıdır.
Böyük Qayıdış proqramı çərçivəsində işğaldan azad edilmiş ərazilərdə məskunlaşma və yaşayış şəraitinin yaradılması istiqamətində işlər həyata keçirilir. Füzulidə yeni evlərin tikilməsi, məktəblərin və sosial obyektlərin yaradılması ailələrin normal həyatına qayıtmasına şərait yaradır. Füzulinin yeni inkişaf dövrü müasir infrastrukturun yaradılması, iqtisadi imkanların genişləndirilməsi, tarixi irsin qorunması və sakinlərin doğma yurda qayıdışı ilə səciyyələnir. Bu istiqamətlərdə görülən işlər rayonun gələcəkdə daha da inkişaf etməsinə zəmin yaradır.
Zərdab rayon Gəlmə kənd sakini, gənc fəal -Ziya Tağızadə