Biz müharibədə qalib gəldik, işğalçıları torpaqlarımızdan qovduq
Biz müharibədə qalib gəldik, işğalçıları torpaqlarımızdan qovduq
Azərbaycanın müharibə yolu ilə üzləşməsi xalqımızın seçimi deyil, uzun illər davam edən işğalın, hərbi təcavüzün və ölkəmizin ərazi bütövlüyünün pozulmasının nəticəsi idi. Azərbaycan münaqişənin sülh yolu ilə həllinə, beynəlxalq hüququn norma və prinsiplərinə əsaslanan ədalətli nizamlanmaya üstünlük versə də, onilliklər ərzində davam edən işğal və onun doğurduğu ağır humanitar fəsadlar ölkəmizin qarşısında ciddi təhlükəsizlik çağırışları yaratmışdır. Azərbaycanın suverenliyini və ərazi bütövlüyünü bərpa etmək əzmini lazımi səviyyədə qiymətləndirməyən qüvvələr xalqımızın milli iradəsini, dövlətimizin siyasi qətiyyətini və Ordumuzun döyüş qabiliyyətini düzgün dəyərləndirmədilər.
2020-ci ilin Vətən müharibəsində qazanılmış tarixi Qələbə Azərbaycan xalqının azadlıq iradəsinin, milli birliyinin və dövlətçilik əzminin təntənəsi oldu. Azərbaycan Ordusu işğal altında olan torpaqlarımızın azad edilməsi uğrunda misilsiz qəhrəmanlıq nümayiş etdirdi, xalqımızın uzun illər davam edən həsrətinə son qoyulması istiqamətində həlledici nəticələr əldə etdi. Bu Qələbə bir daha təsdiqlədi ki, Azərbaycan xalqı öz müstəqilliyini, suverenliyini və ərazi bütövlüyünü qorumaq əzmindədir və bu məqsədlər naminə qarşıya çıxan bütün çətinliklərə sinə gərməyə qadirdir. Azərbaycanın Qələbəsinin mahiyyəti yalnız hərbi üstünlüklə məhdudlaşmır. Bu Qələbə, eyni zamanda, xalqımızın mənəvi dəyərlərinin, humanist ənənələrinin və tarixi məsuliyyət hissinin təzahürüdür. Otuz ilə yaxın davam edən işğal dövründə Azərbaycan xalqı ağır məhrumiyyətlərə məruz qalmış, minlərlə insan həyatını itirmiş, şəhər və kəndlərimiz dağıdılmış, yüz minlərlə vətəndaşımız doğma yurdlarından didərgin salınmışdır. Bütün bu faciələrə baxmayaraq, Azərbaycan dövləti əldə etdiyi hərbi nəticələrdən intiqam siyasəti yürütmək üçün deyil, öz suveren hüquqlarını bərpa etmək və regionda davamlı sülhə nail olmaq məqsədilə istifadə etdiyini bəyan etmişdir.
Ölkəmiz müharibənin ağır nəticələrinə baxmayaraq, regionda yeni qarşıdurmaların qarşısının alınmasını, dövlətlər arasında münasibətlərin beynəlxalq hüququn prinsipləri əsasında normallaşdırılmasını və qarşılıqlı etimadın formalaşdırılmasını vacib hesab edir. Bununla belə, sülhün möhkəmləndirilməsi yalnız bəyanatlarla mümkün deyil. Bu proses qarşılıqlı öhdəliklərə əməl olunmasını, dövlətlərin suverenliyinə və ərazi bütövlüyünə hörmət edilməsini, sərhədlərin toxunulmazlığının tanınmasını və gələcəkdə hərbi təhdidlərə yol verilməməsini tələb edir.
Müharibədən sonra yaranmış sülh şəraiti mühüm nailiyyət olsa da, onun uzunmüddətli və dayanıqlı xarakter alması üçün ardıcıl siyasi iradə və konkret addımlar zəruridir. Cənubi Qafqazda davamlı sabitliyin təmin olunması keçmişin ağır mirasının aradan qaldırılmasını, humanitar məsələlərin həllini, iqtisadi və nəqliyyat əlaqələrinin inkişafını, eləcə də qarşılıqlı etimadın gücləndirilməsini tələb edir. Azərbaycan sülh gündəliyini irəli aparmaqla yanaşı, öz müdafiə qabiliyyətini və milli təhlükəsizliyini təmin etməyi də dövlət siyasətinin mühüm istiqaməti hesab edir. Azərbaycanın tarixi Qələbəsi həm milli suverenliyin bərpasının, həm də sülhə üstünlük verən siyasi iradənin ifadəsidir.
Dilarə Məmmədova- Zərdab şəhər 2 saylı körpələr evi-uşaq bağçasının müdiri