Azərbaycanda meşəçilik elminin banisi – İbrahim Səfərovun zəngin irsi

Faktum.az xəbər verir ki, Azərbaycan elminin və dövlətçilik tarixinin görkəmli nümayəndələrindən biri olan İbrahim Səfər oğlu Səfərov 28 avqust 1913-cü ildə Şamaxı qəzasında anadan olmuşdur. O, ölkəmizdə meşəçilik elminin və dendrologiyanın əsasını qoyan aparıcı alimlərdən biri olmaqla yanaşı, respublikanın meşə təsərrüfatının bərpası və zənginləşdirilməsində misilsiz xidmətlər göstərmişdir. Alim həmçinin Qafqazın “Qırmızı kitabı”nın əsas tərtibçilərindən biri kimi regionun biomüxtəlifliyinin qorunmasına böyük töhfələr vermişdir.

Elmi fəaliyyəti ilə yanaşı yüksək təşkilatçılıq bacarığına malik olan İbrahim Səfərov müxtəlif illərdə məsul dövlət vəzifələrində çalışmışdır. O, 1945–1952-ci illərdə Meşə Təsərrüfatı nazirinin birinci müavini, 1952–1953-cü illərdə Nazirlər Soveti sədrinin müavini və Sovxozlar naziri, 1953–1961-ci illərdə isə Azərbaycan Elmi-Tədqiqat Əkinçilik İnstitutunun direktoru kimi fəaliyyət göstərmişdir.

Biologiya elmləri doktoru, professor və Azərbaycan Milli Elmlər Akademiyasının müxbir üzvü olan İbrahim Səfərov zəngin xidmətlərinə görə “Əməkdar meşəçi” fəxri adına layiq görülmüşdür. 21 noyabr 1998-ci ildə Bakı şəhərində vəfat edən alimin elmi irsi və meşəşünaslıq sahəsində qoyduğu iz bu gün də öz aktual dəyərini qoruyub saxlayır.