Aİ ilə Gürcüstan arasında gərginlik

Gürcüstan 2027-ci il Avropa Təhlükəsizlik və Əməkdaşlıq Təşkilatına ( ATƏT ) sədrlik üçün rəsmi olaraq namizədliyini irəli sürüb, lakin Avropa İttifaqının müqaviməti ilə üzləşib.

Faktum.az  xarici mətbuata istinadən xəbər verir ki, Gürcüstanın xarici işlər naziri Maka Boçorişvili ölkənin bu rola hazır olduğunu və bütün iştirakçı dövlətlərlə əməkdaşlıq etmək niyyətində olduğunu bildirib, lakin Aİ-nin sözçüsü Kristian Viqand Brüsselin Kiprin namizədliyini dəstəkləməyə davam etdiyini və alternativ variantları nəzərdən keçirmədiyini təsdiqləyib.

ATƏT-in öz daxilində çətin vəziyyət yaranıb. Kipr yeganə rəsmi namizəd olaraq qalır, lakin onun namizədliyi Türkiyə tərəfindən bloklanıb. Bu fonda Gürcüstan özünü alternativ namizəd kimi təqdim etməyə çalışır. Bu arada Baltikyanı ölkələr Gürcüstanın namizədliyinə xüsusilə düşmən münasibət bəsləyirlər.

Bu diplomatik mübahisənin 3-4 dekabr tarixlərində Luqanoda keçiriləcək ATƏT Nazirlər Şurasının növbəti iclasında həlli gözlənilir.