Beynəlxalq Rok Gününün arxasındakı canlı əfsanə

Faktum.az  xatırladır ki,  hər il məhz 13 iyul tarixi bütün dünyada Rok musiqisi pərəstişkarları tərəfindən Beynəlxalq Rok Günü  (International Rock Day) olaraq qeyd edilir. Bu xüsusi günün təqvimə düşməsi isə musiqi tarixinin bəlkə də ən möhtəşəm və nəhəng hadisəsi olan,

13 iyul 1985-ci ildə eyni anda London və Filadelfiyada keçirilən məşhur “Live Aid” xeyriyyə konserti ilə birbaşa bağlıdır. Queen, U2, Led Zeppelin, Dire Straits, Devid Boui, Mik Caqqer və Elton Con kimi rok əfsanələrinin səhnə aldığı, təxminən 1.9 milyard insanın canlı yayımla izlədiyi bu tarixi gün, rokun sadəcə bir musiqi janrı deyil, dünyanı birləşdirən və böyük kütlələri hərəkətə gətirən nəhəng bir güc olduğunu sübut etdi. Məhz bu səbəbdən hər il 13 iyulda qlobal musiqi platformaları və roksevərlər həm bu unudulmaz konsertin xatirəsini yad edir, həm də rok mədəniyyətinin azadlıq, üsyan və sevgi dolu fəlsəfəsini yenidən yaşadırlar.