Laos bizim üçün dost ölkədir
Laos bizim üçün dost ölkədir
Azərbaycan Respublikası ilə Laos Xalq Demokratik Respublikası arasında 30 ildən artıq müddətdə davam edən diplomatik münasibətlər iki ölkə arasında dostluq əlaqələrinin və qarşılıqlı əməkdaşlığın mövcudluğunu təsdiq edir. Bu illər ərzində formalaşmış siyasi dialoq, beynəlxalq təşkilatlar çərçivəsində qarşılıqlı dəstək və əməkdaşlıq münasibətlərin inkişafında mühüm rol oynamışdır. Laos Xalq Demokratik Respublikasının Prezidentinin Azərbaycana rəsmi səfəri iki ölkə arasında dostluq əlaqələrinin möhkəmləndirilməsi baxımından xüsusi əhəmiyyət daşıyır. Laos Xalq Demokratik Respublikasının Prezidentinin Zirvə görüşündə iştirakı da ölkələr arasında siyasi dialoqun davam etdirilməsinə və qarşılıqlı münasibətlərin daha da inkişafına verilən önəmi göstərir.
Qeyd edilməlidir ki, Laos Prezidentinin Azərbaycana səfəri ilk dəfə deyil. Prezidentin verdiyi məlumata əsasən, ötən əsrin 80-ci illərində də Azərbaycanda səfərdə olmuşdur. Bununla belə, hazırkı səfər Laos Prezidentinin Azərbaycan Respublikasına ilk rəsmi səfəri kimi tarixə düşür. Bu səfər ikitərəfli münasibətlərin inkişafında mühüm mərhələ olmaqla yanaşı, siyasi əlaqələrin daha da möhkəmləndirilməsi və əməkdaşlığın yeni istiqamətlər üzrə genişləndirilməsi üçün əlavə imkanlar yaradır.
Azərbaycan ilə Laos arasında mövcud dostluq münasibətlərinin gələcəkdə də davam etdirilməsi, siyasi dialoqun möhkəmləndirilməsi və qarşılıqlı maraq doğuran sahələrdə əməkdaşlığın genişləndirilməsi üçün əlverişli zəmin vardır. Rəsmi səfər və Zirvə görüşü çərçivəsində keçirilən tədbirlər bu əlaqələrin daha da inkişaf etdirilməsinə və ikitərəfli münasibətlərin yeni məzmunla zənginləşdirilməsinə xidmət edir.
Azərbaycan ilə Laos arasında əməkdaşlıq çoxtərəfli diplomatiya baxımından da əhəmiyyətlidir. Azərbaycanın beynəlxalq təşkilatlarda fəal iştirakı və Asiyada Qarşılıqlı Fəaliyyət və Etimad Tədbirləri üzrə Müşavirə çərçivəsində fəaliyyəti müxtəlif regionlar arasında dialoqun möhkəmləndirilməsinə töhfə verir. Laos Prezidentinin Bakıda keçiriləcək Zirvə görüşündə iştirakının nəzərdə tutulması da bu istiqamətdə əlaqələrin inkişafı üçün əlavə imkanlar yaradır. Laos Prezidentinin ölkəmizə səfəri zamanı Azərbaycanın inkişafı ilə bağlı səsləndirdiyi fikirlər də diqqətəlayiqdir. Thonqlun Sisulit ölkəmizdə baş verən dəyişiklikləri, Bakının müasir simasını və Azərbaycanın inkişafını yüksək qiymətləndirib. Bu fikirlər müstəqillik dövründə həyata keçirilən quruculuq siyasətinin və əldə olunan sosial-iqtisadi nailiyyətlərin beynəlxalq səviyyədə də maraq doğurduğunu göstərir.
Bütövlükdə, Laos Xalq Demokratik Respublikasının Prezidenti Thonqlun Sisulitin Azərbaycana səfəri və Prezident İlham Əliyevin mətbuata verdiyi bəyanat ikitərəfli münasibətlərin yeni perspektivlərini müəyyənləşdirən mühüm siyasi hadisədir. Qəbul edilən Birgə Bəyanat və imzalanan sənədlər siyasi dialoqun möhkəmləndirilməsi, iqtisadi və investisiya əməkdaşlığının genişləndirilməsi, nəqliyyat bağlantılarının inkişafı və humanitar əlaqələrin gücləndirilməsi üçün əlverişli zəmin yaradır.
Həcər Orucova- Zərdab rayon Gəlmə kənd körpələr evi-uşaq bağçasının müdiri