Bakı Dövlət Peşə Təhsil Mərkəzindən eyni gündə 3 fərqli satınalma

Faktum.az xəbər verir ki, dövlət vəsaitlərinin xərclənməsində şəffaflıq monitorinqi çərçivəsində növbəti şübhəli satınalma əməliyyatları aşkar edilib və bu dəfə diqqət mərkəzimizdə Elm və Təhsil Nazirliyi yanında Peşə Təhsili üzrə Dövlət Agentliyinin tabeliyində olan “Turizm və Sosial Xidmətlər üzrə Bakı Dövlət Peşə Təhsil Mərkəzi” Publik Hüquqi Şəxsi tərəfindən dövlət satınalmaları portalına eyni gündə, yəni 13.07.2026 tarixində daxil edilən üç fərqli müqavilədir.

Ümumi məbləği 55 277,57 AZN təşkil edən bu satınalmalar sənədləşmə forması və tarixlərin manipulyasiyası baxımından ciddi suallar doğurur, çünki hər üç müqavilədə ilk baxışdan qanunvericiliyin məntiqinə zidd olan ən qəribə məqam odur ki, satınalmalar portalda bu gün dərc olunsa da, müqavilələrin faktiki icra və başlama tarixi olaraq 24.06.2026 qeyd edilib. Dövlət satınalma qanunvericiliyinə görə, satınalma rəsmi elan olunmalı, təkliflər yığılmalı, qalib seçilməli və yalnız bundan sonra işə başlanmalı olduğu halda, Peşə Təhsil Mərkəzi rəsmi olaraq bu gün elan etdiyi işlərin icrasına faktiki olaraq təxminən 20 gün əvvəldən başladıqlarını sənədləşdirib ki, bu da podratçıların və qaliblərin tender prosedurlarından çox-çox əvvəl artıq məlum olduğunu, işlərin görüldüyünü və ya malların götürüldüyünü, bu gün isə sadəcə bürokratik olaraq sistemə geriyə dönük qeydlərin daxil edildiyini aşkara çıxarır.

Mərkəzin bir gündə sistemə vurduğu satınalma paketinin detallarına baxdıqda, kotirovka metodu ilə “CAUCASIAN SUPPLIES” MMC-dən (VÖEN: 1507070551) 20 290,57 AZN dəyərində dəftərxana və təsərrüfat mallarının alındığını, yenə kotirovka sorğusu ilə fiziki şəxs Əzizov Əsəd Qacar oğlu ilə (VÖEN: 6402059532) 29 039,8 AZN məbləğində sair torpaq, tikili və avadanlıqların satın alınması müqaviləsinin bağlandığını və reklam xarakterli təbliğat-təşviqat video materiallarının hazırlanması xidməti üçün isə rəqabətli satınalmadan tamamilə imtina edilərək “ADVERA” MMC ilə (VÖEN: 1605706481) birbaşa “Bir mənbə” metodundan istifadə olunmaqla 5 947,2 AZN vəsait ayrıldığını görürük.

Eyni gündə sistemə daxil edilən və hamısının icra tarixi 20 gün geriyə atılan bu müqavilələr dövlət müəssisələrində tez-tez rast gəlinən “faktiki icra sənədləşməsini sonradan çatdırma” və büdcəni qanuniləşdirmə taktikasının bariz nümunəsidir, xüsusilə video çarx çəkilişi üçün rəqabətsiz üsulun seçilməsi və digər təsərrüfat mallarının satınalınmasının iyun ayının rəqəmlərinə bağlanması prosesin şəffaf tender yarışı ilə deyil, əvvəlcədən razılaşdırılmış şəxslərlə həyata keçirildiyi şübhəsi yaradır  və portalda hər şeyə qanuni don geyindirilsə də, tarixlərin bu cür geriyə atılması maliyyə hesabatlılığındakı kölgəli məqamları ört-basdır edə bilmir.