27 Sentyabr Anım Günü: Vətən Uğrunda Müzəffər İradə, Unudulmaz Şəhidlik və Əbədi Ehtiram

2020-ci il sentyabrın 27-si Azərbaycanın müasir dövlətçilik və hərb tarixində təkcə quru sərhədlərimizdə başlayan əks-hücum əməliyyatı ilə deyil, dövlətin ümumi təhlükəsizlik, hərbi-logistik və geopolitik sisteminin tam döyüş hazırılığı vəziyyətinə gətirildiyi gün kimi yadda qaldı. Prezident, Silahlı Qüvvələrin Ali Baş Komandanı cənab İlham Əliyevin Sərəncamı ilə 27 Sentyabrın Anım Günü kimi təsis edilməsi, 44 günlük Vətən müharibəsində canlarını fəda etmiş şəhidlərimizin əziz xatirəsinə göstərilən ali ehtiramın və milli yaddaşın hər il yenidən təzələnməsinin təcəssümüdür. Lakin bu tarixi Zəfəri təhlil edərkən prosesin gözdən uzaq, lakin strateji baxımdan həyati əhəmiyyət kəsb edən dayaqlarına — o cümlədən dəniz sərhədlərimizin təhlükəsizliyinə və dəniz nəqliyyatı infrastrukturunun müharibə dövründəki roluna da diqqət yetirmək zəruridir.

Vətən müharibəsinin başladığı ilk saatlardan etibarən Müzəffər Ordumuz quru cəbhəsində düşmənə sarsıdıcı zərbələr endirərkən, dövlətimizin strateji obyektlərinin, enerjidaşıyıcı infrastrukturunun və dəniz sərhədlərinin təhlükəsizliyi də maksimum səviyyəyə qaldırılmışdı. Xəzər dənizində yerləşən neft-qaz platformaları, kritik dəniz infrastrukturu və strateji kommunikasiya xətləri müharibə şəraitində xüsusi nəzarət altına alındı. Dəniz Nəqliyyatı və Hərbi Dəniz Qüvvələrinin, eləcə də Dövlət Sərhəd Xidmətinin Sahil Mühafizəsinin əlaqəli fəaliyyəti sayəsində dəniz məkanında yarana biləcək hər hansı təxribatın qarşısı əvvəlcədən alındı, ölkənin iqtisadi-enerji arteriyalarının fasiləsiz işi təmin edildi.

Digər tərəfdən, 44 günlük müharibə dövründə dəniz nəqliyyatı və liman infrastrukturu geoiqtisadi təhlükəsizliyin əsas təminatçısına çevrildi. Müharibə şəraitində xarici ticarət dövriyyəsinin, kritik yüklərin və strateji malların daşınmasında Xəzər Dəniz Gəmiçiliyinin (ASCO) və Ələt Beynəlxalq Dəniz Ticarət Limanının fasiləsiz, gecə-gündüz rejimində çalışması arxa cəbhənin dayanıqlığını təmin edən mühüm amillərdən idi. Dənizçilərimizin və liman işçilərinin bu dövrdəki fədakar fəaliyyəti, quru cəbhəsində döyüşən əsgərlərimizin arxasında sarsılmaz bir iqtisadi və logistik sipər yaratdı.

Müharibənin ilk günlərindən dənizçi şəhidlərimiz və qazilərimiz də ön cəbhədə xüsusi təyinatlı qüvvələrin tərkibində, eləcə də müxtəlif istiqamətlərdə qəhrəmanlıqla döyüşdülər. Şuşanın, Hadrutun, Cəbrayılın və digər yaşayış məntəqələrimizin azad olunmasında Hərbi Dəniz Qüvvələrinin Xüsusi Təyinatlıları (Dəniz Piyadaları) misilsiz şücaət göstərdilər. Onların bir çoxu Vətən uğrunda şəhadət şərbətini içərək adlarını tariximizə qızıl hərflərlə yazdırdılar.

Bu gün 27 Sentyabr Anım Günündə biz təkcə quru cəbhəsində deyil, dənizdə, hava məkanında və arxa cəbhədə Vətən üçün canından keçmiş bütün şəhidlərimizi dərin ehtiramla yad edirik. Şəhidlərimizin qanı hesabına bərpa olunmuş ərazi bütövlüyümüz bu gün Xəzərdə də, Qarabağda da, Şərqi Zəngəzurda da əbədi suverenliyimizin zəmanətidir. İndi isə həmin Zəfərin işığında azad olunmuş torpaqlarımızda Böyük Qayıdış proqramı icra olunur, nəqliyyat-logistika koridorları bərpa edilir və Azərbaycan regional lider kimi öz mövqeyini daha da möhkəmləndirir.

Şəhidlərimizin ruhu qarşısında baş əyir, onların əziz xatirəsini hər zaman uca tutacağımızı bəyan edirik.