Qarabağ Zəfərinin zirvəsində Şuşa əməliyyatı
Qarabağ Zəfərinin zirvəsində Şuşa əməliyyatı
2020-ci il noyabrın 8-i Azərbaycan hərb tarixinin ən şanlı səhifələrindən biri kimi əbədi yaddaşlara həkk olunub. Həmin gün Azərbaycan Ordusu Qarabağın döyünən qəlbi, xalqımızın milli-mənəvi varlığının rəmzi olan Şuşa şəhərini işğaldan azad etdi. Bu möhtəşəm hərbi əməliyyat Vətən müharibəsinin taleyini həll edən əsas hadisələrdən biri oldu.
Şuşa əməliyyatı öz mürəkkəbliyi və həyata keçirilmə üsuluna görə hərb tarixində xüsusi yer tutur. Şəhərin yerləşdiyi yüksəklik, ətraf ərazinin sərt dağlıq relyefi, düşmənin qurduğu müdafiə mövqeləri və ağır döyüş şəraiti əməliyyatın həyata keçirilməsini olduqca çətinləşdirirdi. Lakin Azərbaycan əsgərinin peşəkarlığı, döyüş hazırlığı və yüksək mənəvi ruhu bütün maneələri aradan qaldırdı.
Qəhrəman hərbçilərimiz ağır hərbi texnikanın hərəkət edə bilmədiyi ərazilərdən piyada irəliləyərək, meşələrdən, sıldırım qayalardan və dərin dərələrdən keçərək Şuşaya yaxınlaşdılar. Yüngül silahlarla silahlanmış xüsusi təyinatlılarımız yaxın məsafəli döyüşlərdə düşmənə sarsıdıcı zərbələr endirdilər. Bu əməliyyatda Azərbaycan əsgərinin cəsarəti, çevikliyi və döyüş məharəti özünü bütün aydınlığı ilə göstərdi.
Şuşanın azad edilməsi Azərbaycan Ordusunun yüksək döyüş qabiliyyətinin və müasir hərbi strategiyasının parlaq nümunəsi oldu. Uzun illər keçilməz hesab edilən müdafiə mövqelərinin yarılması Ermənistan ordusunun məğlubedilməzliyi barədə yaradılmış mifləri də darmadağın etdi.
Əməliyyatın uğurla başa çatması Azərbaycan xalqının mənəvi qələbəsini daha da möhkəmləndirdi. Şuşanın azad edilməsi ilə düşmənin Qarabağdakı hərbi-siyasi mövqeləri ciddi şəkildə sarsıldı və 44 günlük müharibənin yekunlaşmasına həlledici təsir göstərdi.
Bu tarixi qələbənin əldə olunmasında Müzəffər Ali Baş Komandan İlham Əliyevin qətiyyətli rəhbərliyi, hərbi komandanlığın düzgün qərarları və qəhrəman əsgər-zabitlərimizin misilsiz fədakarlığı mühüm rol oynadı.
Şuşa əməliyyatı bu gün də dünyanın hərbi dairələrinin diqqətini cəlb edən nadir döyüş nümunələrindən biri kimi qiymətləndirilir. Ən əsası isə bu əməliyyat Azərbaycan xalqına öz doğma torpaqlarını azad etmək əzmini, gücünü və iradəsini nümayiş etdirdi. Şuşanı azad edən qəhrəmanların adı xalqımızın yaddaşında daim yaşayacaq. Çünki Şuşa Zəfəri sadəcə bir şəhərin azadlığı deyil, bütöv bir xalqın tarixi qürurunun təntənəsidir.
Rəsul Abbasov – Zərdab rayonu Alıcanlı kənd sakini