Ata vəsiyyəti yerinə yetirildi – Şuşa azaddır!
Ata vəsiyyəti yerinə yetirildi – Şuşa azaddır!
Azərbaycan tarixində elə anlar var ki, həmin anlarda bir xalqın onilliklər boyu yaşadığı həsrət, ümid və arzular gerçəyə çevrilir. 2020-ci il noyabrın 8-də Şuşanın işğaldan azad edilməsi məhz belə unudulmaz hadisələrdən biri oldu. Bu qələbə Azərbaycan xalqının milli qürurunu özünə qaytardı, tarixi ədalətin bərpasını təmin etdi və Ulu Öndər Heydər Əliyevin ideallarının gerçəkləşdiyini nümayiş etdirdi.
Şuşanın azad olunması Prezident İlham Əliyev üçün həm də xüsusi mənəvi məna daşıyırdı. Dövlət başçısı uzun illər ərzində Qarabağın azad edilməsini dövlət siyasətinin əsas məqsədlərindən biri kimi müəyyənləşdirmiş, bu istiqamətdə bütün imkanları səfərbər etmişdi. Ulu Öndər Heydər Əliyevin başladığı dövlət quruculuğu və güclü Azərbaycan strategiyası məhz bu tarixi qələbəyə aparan yolun əsasını təşkil edirdi.
Şuşanın azad olunmasından sonra Prezident İlham Əliyevin xalqa müraciətində səsləndirdiyi fikirlər Azərbaycan tarixinin ən təsirli siyasi bəyanatlarından birinə çevrildi. Dövlət başçısı bildirdi ki, ata vəsiyyətini yerinə yetirib, Şuşanı azad etdikləri üçün xoşbəxtdir. Bu sözlər təkcə bir dövlət rəhbərinin sevincini deyil, həm də xalqın illərlə ürəyində daşıdığı böyük arzunun gerçəkləşməsini ifadə edirdi.
Prezidentin Şəhidlər xiyabanında etdiyi çıxışda Ulu Öndərin məzarını ziyarət etdikdən sonra onun ruhu qarşısında baş əydiyini bildirməsi bu qələbənin mənəvi mahiyyətini daha da gücləndirdi.
Şuşanın azad edilməsi ilə Azərbaycan xalqı öz tarixi-mədəni irsinə, milli kimliyinin mühüm mərkəzinə qovuşdu. Bu qələbə şəhidlərimizin qanı, qazilərimizin sağlamlığı və əsgərlərimizin misilsiz qəhrəmanlığı hesabına əldə edildi.
Bu gün Şuşada aparılan bərpa-quruculuq işləri, keçirilən beynəlxalq tədbirlər və həyata keçirilən layihələr həmin tarixi qələbənin davamıdır. Artıq Şuşa yalnız azad edilmiş şəhər deyil, həm də Azərbaycanın gücünün, milli iradəsinin və gələcəyə inamının rəmzidir.
Ata vəsiyyəti yerinə yetirildi. Şuşa azaddır və Azərbaycan xalqı öz doğma şəhərinə əbədi qayıdıb!
Etibar Talıbov – Zərdab rayonu Alıcanlı kənd sakini