Azərbaycanın mədəniyyət paytaxtı
Azərbaycanın mədəniyyət paytaxtı
Azərbaycanın qədim şəhərləri sırasında özünəməxsus yeri olan Şuşa tarixən xalqımızın mədəniyyətinin, incəsənətinin, ədəbiyyatının və ictimai fikrinin əsas mərkəzlərindən biri olmuşdur. Qarabağın tacı adlandırılan bu şəhər əsrlər boyu Azərbaycan musiqisinin, poeziyasının, memarlığının və milli-mənəvi dəyərlərinin inkişafına misilsiz töhfələr vermişdir.
Şuşanın Azərbaycan mədəniyyətindəki müstəsna mövqeyi onun yetirdiyi görkəmli şəxsiyyətlərin adı ilə də bağlıdır. Xurşidbanu Natəvan, Üzeyir Hacıbəyli, Bülbül, Xan Şuşinski, Cabbar Qaryağdıoğlu və digər sənətkarlar bu şəhərin zəngin mədəni mühitində yetişərək Azərbaycan incəsənətini dünya miqyasında tanıtmışlar. Şuşa həm də muğam sənətinin beşiyi, Azərbaycan musiqi mədəniyyətinin mühüm ocaqlarından biridir.
Şəhərin tarixi-mədəni irsinin qorunmasına hələ sovet dövründə xüsusi diqqət yetirilmişdir. 1977-ci ildə Ümummilli Lider Heydər Əliyevin təşəbbüsü ilə Şuşanın tarixi hissəsinin tarix-memarlıq qoruğu elan edilməsi haqqında qərarın qəbul olunması bu istiqamətdə mühüm addım idi. Həmin qərar şəhərin qədim memarlıq nümunələrinin, tarixi abidələrinin və milli-mədəni irsinin qorunması baxımından böyük əhəmiyyət daşıyırdı.
Şuşanın işğaldan azad edilməsindən sonra bu tarixi missiya yeni mərhələyə qədəm qoydu. Prezident İlham Əliyevin 2021-ci il mayın 7-də imzaladığı Sərəncamla Şuşa Azərbaycanın mədəniyyət paytaxtı elan edildi. Bu qərar şəhərin milli-mənəvi həyatımızdakı əvəzsiz yerinin dövlət səviyyəsində təsdiqi olmaqla yanaşı, onun gələcək inkişafına da mühüm töhfə verdi.
Bu gün Şuşada keçirilən beynəlxalq musiqi festivalları, ədəbi-bədii tədbirlər, elmi konfranslar və mədəniyyət layihələri şəhərin əvvəlki şöhrətinin bərpasına xidmət edir. “Xarıbülbül” Musiqi Festivalı, Vaqif Poeziya Günləri və digər tədbirlər Şuşanın zəngin mədəni ənənələrini yenidən yaşadır.
Şuşa bizim üçün sadəcə bir şəhər deyil. O, milli kimliyimizin, tarixi yaddaşımızın və mədəni irsimizin ayrılmaz hissəsidir. Bu şəhərin dirçəlişi Azərbaycan mədəniyyətinin dirçəlişi deməkdir. Şuşa Azərbaycanın mədəniyyət paytaxtı kimi öz tarixi missiyasını yenidən həyata keçirir və gələcək nəsillərə milli-mənəvi sərvətimiz olaraq ötürülür.
Raqib Əsədov – Zərdab rayonu Alıcanlı kənd sakini