Səhranın ortasında cızılan gizli izlər

Ölüm vadisinin illərlə sirr qalan gəzən daşlarının sirri

Faktum.az  xəbər verir ki, ABŞ-ın Kaliforniya ştatındakı Ölüm Vadisi Milli Parkında yerləşən və heç bir insan və ya heyvan müdaxiləsi olmadan, arxalarında uzun izlər buraxaraq kilometrlərlə hərəkət edən nəhəng qayalar uzun onilliklər boyu elmin ən böyük tapmacalarından biri olub.

Çəkisi yüzlərlə kiloqrama çatan bu daşların quru göl yatağı olan “Racetrack Playa” üzərində necə yer dəyişdirdiyi barədə maqnit sahələrindən tutmuş yadplanetlilərə qədər onlarla mistik fərziyyə irəli sürülsə də, elm adamları uzunmüddətli GPS və kameralı müşahidələrdən sonra bu qeyri-adi hadisənin arxasındakı sadə, lakin mükəmməl təbiət mexanizmini üzə çıxarıblar.

Məlum olub ki, hərəkətin baş verməsi üçün mütləq şəkildə çox nadir hava şəraiti – göl yatağında yüngül su təbəqəsi, gecə saatlarında kəskin soyuq nəticəsində suyun üzərində incə buz təbəqəsinin yaranması və gündüz buzu parçalayaraq daşları sürüşdürə biləcək güclü küləyin əsməsi lazımdır. Məhz bu “şüşə buz” təbəqəsinin üzərinə çıxan nəhəng qayalar küləyin dəstəyi ilə sürtünmə qüvvəsini minimuma endirərək palçıqlı zəmində yavaş-yavaş sürüşür və buz əridikdən sonra arxalarında sanki sehrli şəkildə yaradılmış kimi görünən dərin hərəkət izləri buraxırlar.