Avropanın xəritəsini dəyişən türklər: Atilla və Hun İmperiyası

Faktum.az xəbər verir ki, V əsrdə Avropa qitəsinin siyasi və etnik xəritəsini kökündən dəyişdirən Hun İmperiyası və onun əfsanəvi xaqanı Atilla, dünya hərb tarixinin ən qüdrətli fiqurlarından biri hesab olunur.

Qərbi romalıların “Tanrının qamçısı” adlandırdığı Atilla, Volqa çayından Reyn sahilsinədək, Baltik dənizindən Dunay boyuna qədər uzanan nəhəng bir imperiyanı idarə edərək, dövrün iki böyük supergücü olan Şərqi Roma (Bizans) və Qərbi Roma imperiyalarını özünə vergi verməyə məcbur etmişdir.

451-ci ildə Fransa ərazisində baş verən məşhur Katalaun döyüşü və 452-ci ildə Atillanın İtaliyaya yürüş edərək Roma şəhərinin qapılarına dayanması, Qərbi Roma İmperiyasının çökmə prosesini daha da sürətləndirmişdir. Hunların Avropaya kütləvi axını “Xalqların böyük köçü”nü tətikləyərək müasir Avropa xalqlarının formalaşmasına, feodalizm sisteminin yaranmasına və antik dövrün başa çataraq Orta əsrlər mərhələsinin başlamasına zəmin yaratmışdır.

Böyük sərkərdənin 453-cü ildə müəmmalı şəkildə vəfatından sonra imperiya parçalansa da, Atilla və onun hun süvarilərinin Avropa qitəsində buraxdığı dərin izlər bu gün də tarixçilər tərəfindən dünya sivilizasiyasının ən mühüm dönüş nöqtələrindən biri kimi qiymətləndirilir.