27 Sentyabr – Anım Günü bizə həm də sülhün və əmin-amanlığın nə qədər qiymətli olduğunu xatırladır
27 Sentyabr – Anım Günü bizə həm də sülhün və əmin-amanlığın nə qədər qiymətli olduğunu xatırladır
Müharibənin ağır nəticələrini yaşamış bir xalq kimi Azərbaycan xalqı sülhün və sabitliyin əhəmiyyətini yaxşı anlayır. Bu gün əsas məqsədlərdən biri azad edilmiş ərazilərimizin bərpası, insanların öz doğma yurdlarına qayıtması və həmin ərazilərdə normal həyatın yenidən qurulmasıdır. Bu gün Qarabağ və Şərqi Zəngəzurda genişmiqyaslı quruculuq işləri həyata keçirilir. Yeni yollar, yaşayış məhəllələri, məktəblər, xəstəxanalar və digər sosial obyektlər tikilir. Uzun illər doğma torpaqlarından ayrı düşmüş insanlar öz yurdlarına qayıdırlar. Bu qayıdış şəhidlərimizin arzusunun və uğrunda canlarını fəda etdikləri Vətən torpaqlarının yenidən həyatla dolmasının göstəricisidir.
Anım Günü həm də gələcək nəsillərə mühüm mesaj verir. Gənclərimiz bilməlidirlər ki, bu torpaqların azadlığı asan başa gəlməyib. Azərbaycanın ərazi bütövlüyünün bərpası üçün minlərlə insan öz həyatını fəda edib. Ona görə də şəhidlərimizin xatirəsini yaşatmaq, onların qəhrəmanlığını gələcək nəsillərə çatdırmaq hər birimizin mənəvi borcudur. Şəhid ailələrinin keçirdiyi ağrı və itki sözlə ifadə olunacaq qədər sadə deyil. Onlar övladını, həyat yoldaşını, atasını və ya qardaşını Vətən uğrunda itirib. Buna görə də şəhid ailələrinə hörmət və diqqət göstərmək bütün cəmiyyətin borcudur. Şəhidlərin yaxınlarının yanında olmaq, onların problemlərinə həssas yanaşmaq və onların xatirəsini daim uca tutmaq xalqımızın milli dəyərlərindən biridir. Vətən müharibəsində qəhrəmanlıq göstərən qazilərimizin də xidmətləri xüsusi qeyd olunmalıdır. Onlar döyüş meydanında Vətənin müdafiəsi uğrunda sağlamlıqlarını itiriblər. Bu gün onların sosial müdafiəsi, müalicəsi və cəmiyyətə inteqrasiyası istiqamətində həyata keçirilən tədbirlər mühüm əhəmiyyət daşıyır.
27 Sentyabr tarixində bütün Azərbaycan şəhidlərinin xatirəsini ehtiramla yad edir. Ölkəmizin müxtəlif bölgələrində, şəhər və rayonlarında anım tədbirləri keçirilir, şəhid məzarları ziyarət olunur, onların ruhuna dualar oxunur. İnsanlar şəhidlərin ailələrinə baş çəkir, onların xatirəsini bölüşür və Vətən qarşısında göstərdikləri fədakarlığı minnətdarlıqla xatırlayırlar. Bu gün Azərbaycan xalqının hər bir nümayəndəsi şəhidlərimizin qarşısında baş əyir. Çünki bu gün sahib olduğumuz azadlıq, təhlükəsizlik və ərazi bütövlüyü uğrunda onlar öz həyatlarını fəda ediblər. Onların qəhrəmanlığı Azərbaycan tarixinin ən şərəfli səhifələrindən biri kimi daim yaşayacaq. 27 Sentyabr bizə bir daha göstərir ki, Vətən yalnız yaşadığımız torpaq deyil. Vətən bizim tariximiz, dilimiz, mədəniyyətimiz, milli kimliyimiz və gələcəyimizdir. Vətəni qorumaq isə hər bir vətəndaşın borcudur. Şəhidlərimizin həyat yolu bu borcun ən böyük nümunəsidir.
Bu əlamətdar gündə bütün şəhidlərimizin əziz xatirəsini dərin hörmət və ehtiramla yad edirik. Onların ruhu qarşısında baş əyir, ailələrinə səbir və möhkəm cansağlığı arzulayırıq. Vətən müharibəsində yaralanan və sağlamlığını itirən qazilərimizə minnətdarlığımızı bildiririk. Şəhidlərimizin qəhrəmanlığı heç vaxt unudulmayacaq. Onların adı Azərbaycan xalqının yaddaşında əbədi yaşayacaq. Azad Qarabağımızın hər qarışında şəhidlərimizin müqəddəs xatirəsi var. Bu gün bizə düşən əsas vəzifə həmin qəhrəmanların xatirəsini qorumaq, Vətənimizi sevmək, ölkəmizin inkişafına öz töhfəmizi vermək və gələcək nəsillərə daha güclü, daha firavan Azərbaycan ötürməkdir.
Kəmalə Əliyeva – Zərdab rayonu, Əlibəyli kənd tam orta ümumtəhsil məktəbinin direktoru