Azərbaycanın Mərkəzi Asiya ölkələri ilə münasibətləri son illərdə daha da genişlənir
Azərbaycanın Mərkəzi Asiya ölkələri ilə münasibətləri son illərdə daha da genişlənir
Xüsusilə Qırğızıstanla əlaqələr ortaq tariximizə, dilimizə, mədəniyyətimizə və qardaşlıq bağlarına əsaslanır. Bu münasibətlər təkcə siyasi sahədə deyil, iqtisadiyyat, nəqliyyat, enerji, təhsil, mədəniyyət və humanitar istiqamətlərdə də inkişaf edir.
Prezident İlham Əliyevin Qırğız Respublikasına dövlət səfəri iki ölkə arasında əməkdaşlığın daha da möhkəmlənməsi baxımından mühüm hadisə oldu. Səfər çərçivəsində keçirilən yüksək səviyyəli görüşlər və imzalanan sənədlər göstərdi ki, Azərbaycan və Qırğızıstan münasibətləri artıq yeni inkişaf mərhələsinə qədəm qoyub.
Səfərin ən əlamətdar nəticələrindən biri Azərbaycan ilə Qırğızıstan arasında müttəfiqlik münasibətləri haqqında müqavilənin imzalanması oldu. Bu sənəd iki ölkənin gələcəkdə siyasi, iqtisadi və təhlükəsizlik sahələrində əməkdaşlığını daha da gücləndirmək üçün möhkəm hüquqi əsas yaradır. Eyni zamanda nəqliyyat, investisiya, rəqəmsal inkişaf və digər sahələri əhatə edən sənədlərin imzalanması qarşılıqlı əlaqələrin daha da genişlənəcəyindən xəbər verir.
Dövlət başçılarının qarşılıqlı şəkildə ali dövlət mükafatları ilə təltif olunması da iki ölkə arasında dostluğun və qarşılıqlı hörmətin yüksək səviyyədə olduğunu göstərən mühüm hadisələrdən biri kimi yadda qaldı. Bu addımlar Azərbaycan ilə Qırğızıstan arasında münasibətlərin yalnız rəsmi diplomatik əlaqələrdən ibarət olmadığını, eyni zamanda qardaşlıq və qarşılıqlı etimada söykəndiyini nümayiş etdirdi.
Çolpon-Ata şəhərində keçirilən Mərkəzi Asiya dövlət başçılarının qeyri-rəsmi Zirvə görüşü və qəbul edilən Çolpon-Ata Bəyannaməsi də region ölkələri arasında əməkdaşlığın daha da inkişaf etdirilməsi baxımından əhəmiyyətli oldu. Bu görüş Türk dünyasında həmrəyliyin möhkəmlənməsinə, ortaq layihələrin həyata keçirilməsinə və regional əməkdaşlığın genişlənməsinə yeni imkanlar açdı.
Azərbaycan son illərdə Mərkəzi Asiya ölkələri üçün etibarlı tərəfdaş kimi öz mövqeyini daha da gücləndirib. Xəzər dənizi üzərindən keçən nəqliyyat marşrutları, enerji layihələri və ticarət əlaqələrinin inkişafı ölkəmizin regionlar arasında mühüm körpü rolunu daha da artırır. Bu isə həm Azərbaycanın, həm də tərəfdaş ölkələrin iqtisadi inkişafına və qarşılıqlı faydalı əməkdaşlığına xidmət edir.
Bütövlükdə, Prezident İlham Əliyevin Qırğız Respublikasına dövlət səfəri Azərbaycan-Qırğızıstan münasibətlərində yeni səhifə açdı. İmzalanan sənədlər, keçirilən görüşlər və əldə olunan razılaşmalar göstərir ki, iki qardaş ölkə gələcəkdə də əməkdaşlığı genişləndirmək, Türk dünyasında birliyi gücləndirmək və regionda sabitliklə inkişafın təmin olunması istiqamətində birgə fəaliyyətlərini davam etdirəcəklər. Bu əməkdaşlıq təkcə iki ölkə üçün deyil, bütövlükdə Türk dünyasının və Mərkəzi Asiya-Cənubi Qafqaz regionunun gələcək inkişafı baxımından da mühüm əhəmiyyət daşıyır.
Kəmalə Əliyeva – Zərdab rayonu, Qaravəlli kənd tam orta ümümtəhsil məktəbinin direktoru