“ASAN” dövlət xidmətləri sistemimiz Kambocada da maraq doğurur
“ASAN” dövlət xidmətləri sistemimiz Kambocada da maraq doğurur
Müasir beynəlxalq iqtisadi münasibətlərdə dövlətlərin dayanıqlı inkişafı müxtəlif bazarlarla əlaqələrin qurulmasından, ixrac imkanlarının genişləndirilməsindən və investisiya tərəfdaşlıqlarının şaxələndirilməsindən asılıdır. Cənab Prezident İlham Əliyevin Kamboca Krallığının Baş naziri ilə görüşü zamanı səsləndirdiyi fikirlər Azərbaycanın bu istiqamətdə fəal siyasət həyata keçirdiyini göstərir. İkitərəfli münasibətlərin yalnız diplomatik təmaslarla məhdudlaşmaması, ticarət və investisiya sahələrində konkret nəticələrə hesablanması dövlətlərarası əməkdaşlığın müasir tələblərə uyğun inkişafına xidmət edir.
Azərbaycanın mümkün potensialı və Avropa ilə Asiya arasında yerləşməsi ölkəyə müxtəlif istiqamətlərdə tərəfdaşlıq əlaqələri qurmaq imkanı verir. Eyni zamanda, bu göstərici iqtisadi münasibətlərin genişləndirilməsi üçün araşdırılmalı imkanların mövcudluğunu ortaya qoyur. Azərbaycan ilə Kamboca arasında əməkdaşlığın genişləndirilməsi baxımından dövlət idarəçiliyi və ictimai xidmətlərin təşkili sahəsində təcrübə mübadiləsi də mühüm perspektivlərə malikdir. Bu kontekstdə Azərbaycanın innovativ idarəetmə yanaşmalarını özündə birləşdirən “ASAN xidmət” modelinə Kamboca tərəfinin maraq göstərməsi xüsusi əhəmiyyət daşıyır. Sözügedən model dövlət xidmətlərinin vətəndaşlara daha əlçatan, operativ və şəffaf şəkildə təqdim olunmasına, eləcə də dövlət orqanlarının fəaliyyətində səmərəliliyin artırılmasına yönəlmişdir.
“ASAN xidmət” sisteminin fəaliyyəti Azərbaycan cəmiyyətində yüksək ictimai rəğbətlə qarşılanmış, onun xidmət keyfiyyəti və vətəndaş məmnunluğunun təmin olunması istiqamətində əldə etdiyi nəticələr bu modelin beynəlxalq səviyyədə tanıdılmasına zəmin yaratmışdır. Azərbaycanın dövlət xidmətlərinin təşkili sahəsində formalaşdırdığı bu təcrübənin ölkəmizin dost tərəfdaşları tərəfindən öyrənilməsi və tətbiqinə maraq göstərilməsi institusional əməkdaşlığın genişləndirilməsi üçün əlavə imkanlar açır.
“ASAN xidmət” modelinin Kambocada öyrənilməsi və yerli şəraitə uyğun tətbiqi imkanlarının araşdırılması ikitərəfli münasibətlərimizin yeni istiqamətlərlə zənginləşdirilməsinə töhfə verə bilər. Bu məqsədlə müvafiq qurumlar arasında təcrübə mübadiləsinin təşkili, ekspert səviyyəsində müzakirələrin aparılması və dövlət xidmətlərinin rəqəmsallaşdırılması sahəsində əməkdaşlığın inkişaf etdirilməsi məqsədəuyğun olardı. Belə təşəbbüslər yalnız dövlət idarəçiliyinin təkmilləşdirilməsi baxımından deyil, həm də Azərbaycan və Kamboca arasında institusional əlaqələrin möhkəmləndirilməsi, innovativ həllərin təşviqi və qarşılıqlı faydalı tərəfdaşlığın dərinləşdirilməsi baxımından əhəmiyyətlidir. Əminik ki, dövlət xidmətləri sahəsində təcrübəmizin bölüşdürülməsi iki ölkə arasında əməkdaşlığın praktiki məzmununu genişləndirəcək və ikitərəfli münasibətlərin gələcək inkişafına müsbət töhfə verəcəkdir.
Bu gün Azərbaycan və Kamboca arasında ticarət və investisiya əlaqələrinin genişləndirilməsi hər iki ölkənin bazar imkanlarının artırılmasına və yeni tərəfdaşlıq modellərinin yaradılmasına kömək edə bilər. Bu baxımdan hazırkı diplomatik təmaslar uzunmüddətli iqtisadi əməkdaşlığın inkişafı üçün əhəmiyyətli zəmin formalaşdırır.
Nurlu Mikayılova- Zərdab rayon Məlikli kənd körpələr evi-uşaq bağçasının müdiri