2023-cü il noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirildi
2023-cü il noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirildi. Xankəndidə keçirilən hərbi parad Azərbaycanın dövlətçilik tarixində mühüm hadisələrdən biri kimi yadda qaldı. Bu tədbir 44 günlük Vətən müharibəsində qazanılmış Zəfərin ildönümünün qeyd olunması ilə yanaşı, Azərbaycanın ərazi bütövlüyünün və dövlət suverenliyinin bərpasından sonra yaranmış yeni reallıqların nümayişi baxımından da əhəmiyyət daşıyırdı. Paradda Azərbaycan Ordusunun müxtəlif qoşun növlərinin şəxsi heyəti, hərbi texnikası və silah sistemləri nümayiş etdirildi. Tədbirin Xankəndidə keçirilməsi isə Zəfər Gününün qeyd olunmasına xüsusi tarixi məna verdi.“Üç il bundan əvvəl Qarabağın tacı olan Şuşa şəhəri işğalçılardan azad edildi. Ondan bir gün sonra düşmən ordusu təslim oldu və ağ bayraq qaldırdı. Beləliklə, İkinci Qarabağ müharibəsi Azərbaycan dövlətinin tam Zəfəri ilə nəticələndi. Bu, tarixi hadisədir.Azərbaycan xalqı uzun illər ərzində işğal dövründə bir nöqtəyə vururdu ki, tezliklə bizim torpaqlarımız işğalçılardan azad edilsin. Biz bu müqəddəs günü hər gün, hər saat öz əməyimizlə, işimizlə yaxınlaşdırırdıq.Birinci dəfə Azərbaycan xalqı mənə böyük etimad göstərəndə, 20 il bundan əvvəl Prezident kimi əziz xalqıma söz vermişdim: əlimdən gələni edəcəyəm ki, biz ərazi bütövlüyümüzü bərpa edək. Həm seçkilər ərəfəsində, həm andiçmə mərasimində doğma xalqıma söz vermişdim ki, gün gələcək biz Azərbaycanın Dövlət Bayrağını işğal altında olan torpaqların hər bir guşəsində qaldıracağıq. Xatırlayıram, beş il bundan əvvəl – 2018-ci ilin sentyabrında Bakının Azadlıq meydanında keçirilmiş hərbi paradda çıxış edərkən demişdim ki, gün gələcək Azərbaycan Bayrağı bu gün hələ də işğal altında olan bütün torpaqlarda qaldırılacaqdır və bu gün gəldi.” – deyə Prezident İlham Əliyev çıxışında bildirib.Xankəndidə keçirilən hərbi parad Azərbaycan xalqının yaddaşında 8 noyabr – Zəfər Günü ilə bağlı mühüm tarixi hadisələrdən biri kimi yer aldı. 2020-ci il noyabrın 8-də Şuşanın azad edilməsi Vətən müharibəsinin gedişində həlledici mərhələlərdən biri oldu. Şuşanın azad edilməsindən sonra noyabrın 10-da Azərbaycan, Ermənistan və Rusiya arasında üçtərəfli bəyanat imzalandı və hərbi əməliyyatlar dayandırıldı. Bəyanat çərçivəsində Ağdam, Kəlbəcər və Laçın rayonlarının Azərbaycana qaytarılması ilə ərazilərin böyük hissəsi üzərində Azərbaycanın nəzarəti bərpa edildi.2023-cü ilin sentyabrında Azərbaycan ərazisində həyata keçirilmiş hərbi tədbirlərdən sonra Qarabağda dövlət suverenliyinin bərpası ilə bağlı yeni mərhələ başladı. Oktyabrın 15-də Azərbaycan Prezidenti İlham Əliyev Xankəndidə, Xocalıda, Xocavənddə və Ağdərədə Azərbaycan Respublikasının Dövlət Bayrağını ucaltdı. Beləliklə, 2020-ci ildə əldə olunmuş hərbi Zəfərdən sonra Azərbaycanın ərazi bütövlüyünün və dövlət suverenliyinin təmin olunması istiqamətində mühüm hadisələr baş verdi.Noyabrın 8-də Xankəndidə keçirilən parad həm də Azərbaycan Ordusunun inkişafının və hərbi potensialının nümayişi baxımından diqqət çəkdi. Hərbi paradda nümayiş etdirilən texnika və silah sistemləri müasir Azərbaycan Ordusunun arsenalını əks etdirirdi. Tədbir Azərbaycan Silahlı Qüvvələrinin şəxsi heyətinin döyüş hazırlığı və peşəkarlığının nümayiş etdirilməsi ilə müşayiət olundu.Xankəndidə Zəfər Gününə həsr olunmuş hərbi paradın keçirilməsi həmçinin Azərbaycanın Qarabağda həyata keçirdiyi bərpa və quruculuq prosesinin yeni mərhələsi ilə eyni dövrə təsadüf etdi. İşğaldan azad edilmiş ərazilərdə şəhər və kəndlərin yenidən qurulması, müasir infrastrukturun yaradılması, nəqliyyat-kommunikasiya imkanlarının genişləndirilməsi və əhalinin doğma torpaqlarına qayıdışının təmin edilməsi istiqamətində layihələr həyata keçirilir.Vətən müharibəsində qazanılan Zəfər Azərbaycan tarixinin mühüm səhifələrindən biri kimi qiymətləndirilir. 44 gün davam edən müharibənin nəticələri ölkənin ərazi bütövlüyünün bərpası prosesində dönüş nöqtəsi oldu. Zəfərdən sonrakı dövrdə isə qarşıda duran əsas məsələlərdən biri əldə edilmiş nəticələrin davamlı sülh, təhlükəsizlik və quruculuqla möhkəmləndirilməsi, işğaldan azad edilmiş ərazilərin sosial-iqtisadi inkişafının təmin olunmasıdır.Xankəndidə keçirilən hərbi parad bu baxımdan həm tarixi hadisələrin yad edilməsi, həm də Azərbaycanın dövlət suverenliyinin və dövlətçilik ənənələrinin nümayiş etdirilməsi baxımından əlamətdar tədbir oldu. Üç il əvvəl Şuşada başlayan Zəfər yolu 2023-cü ildə Xankəndidə keçirilən paradla yeni tarixi mərhələyə qədəm qoydu. Bu mərhələnin əsas məzmununu isə azad edilmiş ərazilərin bərpası, dayanıqlı inkişafı və həmin torpaqlarda həyatın yenidən canlandırılması təşkil edir.
Qocayev Rövşən – Zərdab şəhər sakini, fəal gənc