8 avqustda Azərbaycan tarixində baş verən mühüm hadisələr

Faktum.az xəbər verir ki, avqustun 8-i Azərbaycanın yaxın və uzaq tarixində iki mühüm inzibati və tarixi hadisə ilə yadda qalıb.

1930-cu il – İnzibati ərazi bölgüsündə yeni mərhələ

1930-cu il avqustun 8-də Azərbaycan SSR tərəfindən ölkənin inzibati-ərazi bölgüsündə mühüm qərar qəbul edilib. Həmin gün Lənkəran, Astara, Cəbrayıl, Kəlbəcər, Ağdaş və digər bir sıra rayonlar müstəqil inzibati ərazi vahidi kimi təsis olunub. Bu qərar həmin bölgələrin mərkəzləşdirilmiş idarəetmə sisteminə inteqrasiyası və yerli təsərrüfatın inkişafı üçün yeni mərhələnin əsasını qoyub.

1991-ci il – Ermənistandan azərbaycanlıların sonuncu deportasiyası

1991-ci il avqustun 8-də Ermənistan ərazisində soydaşlarımızın yaşadığı sonuncu yaşayış məntəqəsi olan Meğri rayonunun Nüvədi kəndi məcburi şəkildə dədə-baba torpaqlarından çıxarılıb. Nüvədi kəndinin boşaldılması ilə XX əsrdə Ermənistandan azərbaycanlıların kütləvi deportasiyası və etnik təmizlənməsi prosesinin sonuncu mərhələsi tamamlanıb və Ermənistan ərazisi tam olaraq azərbaycanlılardan təmizlənib.