”Namusla qadın satıram”

Faktum.az xəbər verir ki, namus və qadın satmaq ifadələrini bir araya gətirən, bir-birinə zidd bu iki anlayışı eyni müstəvidə birləşdirən Türkiyədə ilk rəsmi fahişəxana şəbəkəsini leqallaşdıran Matild Manukyan olub.

Erməni əsilli Matild 1914-cü ildə İstanbulda dünyaya gəlib. Ailə qurduqdan və həyat yoldaşını itirdikdən sonra əvvəlcə dərziliklə məşğul olub. Eyni zamanda atasından qalan evləri Türkiyədə “genel ev” adlandırılan fahişəxanaları idarə edənlərə kirayə verib. Kirayəçilərdən biri borcunu ödəyə bilmədiyi üçün ona fahişəxananı şərik işlətməyi təklif edib. Qısa müddət ərzində fahişəxanalar zənciri yaradan Manukyan “fahişəxana kraliçası” adını qazanıb.

Öz əlində 37 fahişəxana cəmləşdirən Matild, dövlət səviyyəsində bu qazanc sahəsinin təhlükə ilə üzləşdiyi bir dövrdə hakimiyyətlə razılığa gələrək gəlirindən vergi ödəmək öhdəliyi götürüb. Məzmunun ən acınacaqlı tərəflərindən biri odur ki, o, dövrün siyasi xadimləri, yüksək vəzifəli məmurlar və iş adamları ilə yaxın münasibətlər qurub. “İşimdən əsla utanmıram” deyən Manukyana bir çox nüfuzlu şəxslərin havadarlıq etdiyi bildirilir.

Mənbələrə görə, qazandığı saya gəlməz sərvəti ilə müxtəlif qaranlıq dairələrlə əlaqədə olan Manukyanın fəaliyyəti illər ərzində Türkiyədə dəfələrlə müzakirələrə səbəb olub. O, Türkiyədə 4 dəfə vergi rekortmeni də olub. Hətta qanunsuz əməllərinə görə məsuliyyətə cəlb olunduğu zaman belə məhkəmə prosesləri zamanı qarşılaşdığı boşluqlar onun sərbəst qalmasına şərait yaradıb. Dövlət qanunlarını qorumağa borclu olan bəzi məmurların bu qaranlıq mexanizm qarşısında aciz qalması cəmiyyətdə hər zaman haqlı narazılıq doğurub.

Tarixin bu səhifəsi həm hüquqi, həm də mənəvi baxımdan cəmiyyətin yaddaşında dərin izlər qoyan ziddiyyətli məqamlarla yadda qalıb.

Tərifə Şükürqızı