Müttəfiqlik münasibətləri çox böyük məsuliyyət deməkdir
Müttəfiqlik münasibətləri çox böyük məsuliyyət deməkdir
Azərbaycan və Qırğızıstan arasında əlaqələr son illərdə sürətlə inkişaf edir. İki ölkə yalnız dost və qardaş deyil, həm də etibarlı tərəfdaş kimi bir-birinə dəstək verir. Prezident İlham Əliyevin 2026-cı il iyulun 31-də Qırğızıstana dövlət səfəri bu münasibətlərin daha da möhkəmləndiyini göstərdi. Səfər zamanı keçirilən görüşlər və mətbuata verilən bəyanatlar gələcək əməkdaşlıq üçün yeni imkanlar açdı. Prezident İlham Əliyev çıxışında bildirdi ki, müttəfiqlik münasibətləri çox böyük məsuliyyət deməkdir. Bu münasibətlər qarşılıqlı etimada, hörmətə və verilən sözə sadiqliyə əsaslanır. Azərbaycan və Qırğızıstan bütün sahələrdə əməkdaşlığı daha da genişləndirmək niyyətindədir. Dövlət başçısı vurğuladı ki, iki ölkə arasında siyasi əlaqələr yüksək səviyyədədir. Azərbaycan və Qırğızıstan beynəlxalq təşkilatlarda bir-birini dəstəkləyir, mühüm məsələlərdə ortaq mövqe nümayiş etdirirlər. Bu əməkdaşlıq regionda sülhün və sabitliyin möhkəmlənməsinə də töhfə verir.
Bəyanatda iqtisadi əlaqələrin inkişafına da xüsusi diqqət yetirildi. Ticarət dövriyyəsinin artırılması, nəqliyyat marşrutlarının genişləndirilməsi, investisiya layihələrinin həyata keçirilməsi və sahibkarlar arasında əməkdaşlığın gücləndirilməsi hər iki ölkə üçün böyük əhəmiyyət daşıyır. Təhsil və mədəniyyət sahəsində həyata keçirilən layihələr də dostluq əlaqələrinin möhkəmlənməsində mühüm rol oynayır. Ağdam şəhərində Manas adına məktəbin fəaliyyət göstərməsi Azərbaycan ilə Qırğızıstan arasında qardaşlığın gözəl nümunəsidir. Bu layihə gələcək nəsillərə ortaq dəyərləri və dostluq ruhunu aşılayır.
Prezident İlham Əliyevin səfəri bir daha göstərdi ki, müttəfiqlik yalnız imzalanan sənədlərlə deyil, həm də qarşılıqlı etimad və birgə fəaliyyətlə möhkəmlənir. Azərbaycan və Qırğızıstan bundan sonra da bütün sahələrdə əməkdaşlığı davam etdirəcək. Bu münasibətlər xalqlarımızın rifahına xidmət etməklə yanaşı, Türk dünyasında birliyin və həmrəyliyin daha da güclənməsinə mühüm töhfə verəcəkdir.
Zərdab rayon Əlibəyli kənd tam orta ümumtəhsil məktəbinin müəllimi-Aliyə Rüstəmova