Zərbə Zamanı Bədənin Göyərməsinin Anatomik və Bioloji Səbəbi

Bədənin hər hansı bir yeri bərk bir əşyaya dəydikdə və ya zərbə aldıqda dəri səthi cırılmasa da, dərinin alt təbəqələrində yerləşən xırda qan damarları – kapilyarlar zədələnir və cırılır.

Faktum.az xəbər verir ki, tibbdə “hematoma” və ya “kontuziya” adlanan bu proses zamanı damarlardan sızan qan ətrafdakı yumşaq toxumalara və dəri altına toplanır. Dəri şəffaf strukturda olduğu üçün toplanan bu qan xaricdən tünd qırmızı, bənövşəyi və ya göy rəngdə görünür.

Göyərmənin zamanla rəng dəyişməsi isə organizmin sağalma mexanizminin göstəricisidir. Zərbədən dərhal sonra toplanan təzə qan oksigenlə zəngin olduğu üçün əvvəlcə qırmızı-bənövşəyi görünür. 1-2 gün keçdikdən sonra qandakı eritrositlər oksigenini itirir və rəng tünd göyə və ya qara-bənövşəyiyə çevrilir.

Təxminən 5-10 gün ərzində bədənin immunitet hüceyrələri (makrofaqlar) zədələnmiş yeri təmizləməyə başlayır; hemoglobin parçalanaraq biliverdin (yaşıl piqment) və bilirubin (sarı-narıncı piqment) maddələrinə çevrilir. Bu səbəbdən göyərmiş yer tədricən yaşıla, sonra sarıya çalır və nəhayət toxuma tamamən sorulduqda dəri öz əvvəlki təbii rənginə qayıdır.