Kino və teatr səhnəsinin unudulmaz siması: Əməkdar artist Zilli Namazov
Faktum.az xəbər verir ki, 9 sentyabr 1951-ci ildə anadan olan Azərbaycan Respublikasının Əməkdar artisti Zilli Namazov milli teatr və kino sənətimizin inkişafında özünəməxsus xidmətləri olan sənətkarlardandır. İncəsənət İnstitutunun kino-aktyorluq fakültəsində görkəmli ustad Adil İsgəndərovun kursunu bitirən aktyor, səhnədə və ekranda canlandırdığı xarakterik obrazlarla tamaşaçıların rəğbətini qazanmışdır.
Zilli Namazov təkcə istedadlı aktyor kimi deyil, həm də kinostudiyada uzun illər ikinci rejissor və rejissor assistenti kimi səmərəli fəaliyyət göstərmişdir. O, xüsusilə görkəmli kino rejissoru Vaqif Mustafayevin çəkdiyi bir çox məşhur filmlərin ərsəyə gəlməsində təşkilatçı və rejissor kimi yaxından iştirak etmiş, milli kino sənətinə böyük töhfələr vermişdir. Azərbaycan kinematoqrafiyasının inkişafındakı xidmətlərinə görə Fəxri fərman və müvafiq dövlət mükafatları ilə təltif olunan sənətkar, sənətə olan sadiqliyi və yaratdığı surətlərlə mühüm iz qoymuşdur.