İlk Dərəcəli Qadın Oftalmoloq-Alim Ümnisə Musabəyova Anadan Olub

Faktum.az xəbər verir ki, oktyabrın 9-da Azərbaycan tibb elminin prioritet sahələrindən olan oftalmologiyanın inkişafında müstəsna xidmətləri olan ilk azərbaycanlı qadın elmlər doktoru, professor Ümnisə Musabəyovanın doğum günüdür (1902–1974).

1902-ci il oktyabrın 9-da Qazax şəhərində anadan olan Ümnisə Musabəyova ömrünü göz xəstəliklərinin öyrənilməsinə, müalicəsinə və bu sahədə gənc kadrların yetişdirilməsinə həsr etmişdir. O, 1926-cı ildə Azərbaycan Dövlət Universitetinin tibb fakültəsini bitirdikdən sonra elmi və praktiki fəaliyyətini Əziz Əliyev adına Azərbaycan Dövlət Həkimləri Təkmilləşdirmə İnstitutunda davam etdirmiş, uzun illər həmin institutun Göz xəstəlikləri kafedrasına rəhbərlik etmişdir.

Ümnisə Musabəyova Azərbaycanda oftalmologiya sahəsində tibb elmləri doktoru elmi dərəcəsini alan ilk azərbaycanlı qadın alimdir.

Alimin elmi işləri əsasən traxoma, qlaukoma, gözün damar sistemi patologiyaları və peşə xəstəliklərinin gözə təsirinin öyrənilməsinə həsr olunmuşdur. Onun yazdığı dərsliklər və monoqrafiyalar onilliklər boyu həkim-oftalmoloqların masaüstü kitabı olmuşdur.

1959-cu ildə Azərbaycan SSR Elmlər Akademiyasının müxbir üzvü seçilmiş, “Əməkdar elm xadimi” fəxri adına və bir çox dövlət təltiflərinə layiq görülmüşdür.

Azərbaycan tibb tarixinin parlaq simalarından biri olan professor Ümnisə Musabəyovanın xatirəsi xalqımızın qəlbində və elm tariximizdə daim yaşayır.