Əməkdar Elm Xadimi, Professor Havar Məmmədovun Doğum Günüdür

Faktum.az xəbər verir ki, oktyabrın 9-da Azərbaycanın elm və təhsil sahəsində tanınmış xadimi, əməkdar elm xadimi, texnika elmləri doktoru, professor Havar Məmmədovun doğum günüdür.

1945-ci il oktyabrın 9-da İmişli rayonunun Qızılkənd kəndində  anadan olan Havar Məmmədov ömrünün böyük hissəsini Azərbaycanın ali təhsil sisteminin inkişafına, informasiya-kommunikasiya texnologiyaları və avtomatlaşdırma sahəsində yüksəkixtisaslı kadrların hazırlanmasına həsr etmişdir.

O, uzun illər ərzində ölkənin aparıcı ali təhsil müəssisələrinə rəhbərlik etmiş – Azərbaycan Texniki Universitetinin (AzTU) və Bakı Mühəndislik Universitetinin (BMU) rektoru vəzifələrində çalışmışdır. Rəhbərlik etdiyi dövrlərdə ali məktəblərdə tədrisin keyfiyyətinin artırılması, beynəlxalq əlaqələrin genişləndirilməsi və elmi-tədqiqat bazasının gücləndirilməsi istiqamətində mühüm addımlar atmışdır.

Professor Havar Məmmədov çoxsaylı elmi məqalənin, dərslik və monoqrafiyanın müəllifidir. Azərbaycan elminin və təhsilinin inkişafındakı müstəsna xidmətlərinə görə dövlətimiz tərəfindən “Əməkdar elm xadimi” fəxri adına və müxtəlif dövlət təltiflərinə layiq görülmüşdür.

Faktum.az redaksiyası adından hörmətli professor Havar Məmmədovu doğum günü münasibətilə samimi qəlbdən təbrik edir, mətbuatımız və elmi ictimaiyyətimiz adından ona möhkəm cansağlığı, uzun ömür və elmi-pedaqoji fəaliyyətində yeni-yeni uğurlar arzulayırıq!