Döyüş sənətindən Olimpiya zirvəsinə: Dünya Taekvondo Günü necə yarandı?

Faktum.az xəbər verir ki, hər il sentyabrın 4-ü beynəlxalq idman ictimaiyyəti tərəfindən Dünya Taekvondo Günü kimi təntənəli şəkildə qeyd olunur. Əsası Koreyada qoyulan bu qədim döyüş sənəti üçün 1994-cü il sentyabrın 4-ü tarixi dönüş nöqtəsi olub.

Eynilə həmin gün Beynəlxalq Olimpiya Komitəsinin (BOK) Parisdə keçirilən 103-cü sessiyasında taekvondonun rəsmi olaraq Yay Olimpiya Oyunlarının proqramına daxil edilməsi haqqında qərar qəbul edilib. Bu qərardan sonra taekvondo ilk dəfə 2000-ci ildə Sidney Olimpiadasında tamhüquqlu medal idman növü kimi debüt edib.

Dünya Taekvondo Federasiyası (WT) tərəfindən 2006-cı ildən etibarən rəsmiləşdirilən bu xüsusi gün yalnız idman uğurlarını deyil, həm də taekvondonun təməl fəlsəfəsi olan intizam, ehtiram, nəzakət və sülh dəyərlərini təbliğ etmək məqsədi daşıyır.