Diplomsuz kosmetoloqlar qadınları necə şikəst edir?
Son zamanlar sosial şəbəkələrdə geniş vüsət alan, cəlbedici endirimlər və “möcüzəvi dəyişim” şüarları ilə təqdim olunan estetik prosedurlar, əslində, yüzlərlə qadının həyatını və sağlamlığını təhlükə altına atan böyük bir fəlakətə çevrilib. Bu gün Bakı şəhəri başda olmaqla, ölkənin bir çox yerində fəaliyyət göstərən gözəllik salonlarında heç bir tibbi təhsili, diplomu və lisenziyası olmayan şəxslər özlərini “həkim-kosmetoloq” kimi təqdim edərək insanları açıq-aşkar şikəst edirlər. Bir neçə günlük sex tipli kursların saxta sertifikatları ilə silahlanan bu şəxslər, insan anatomiyasından tamamilə xəbərsiz olduqları halda botoks, üz və dodaq dolğusu kimi ciddi invaziv müdaxilələr həyata keçirirlər. İş o yerə çatıb ki, bu qondarma “həkimlər” hədlərini aşaraq, yalnız steril əməliyyatxana şəraitində və peşəkar plastik cərrahlar tərəfindən icra olunmalı olan üzgərmə (iplə asqı), qaşqaldırma və digər cərrahi kəsik tələb edən əməliyyatları adi salon kreslolarında, antisanitar mühitdə həyata keçirirlər.
Bu qanunsuz fəaliyyətlərin nəticələri isə dəhşətlidir. Üz nahiyəsinin sinir xəritəsindən və damar strukturundan bixəbər olan saxtakarlar iynə və ya skalpel ilə birbaşa mühüm sinirlərə toxunurlar. Prosedurlardan dərhal sonra və ya bir neçə gün ərzində qadınların üzündə, dodaqlarında geri dönüşü olmayan ifliclər (fasialis zədələnmələri), simmetriyanın pozulması, əyilmələr və toxuma nekrozları (çürümə) baş verir. Üstəlik, heç bir təhlükəsizlik tədbiri görülməyən bu məkanlarda xəstəyə yeridilən maddə anafilaktik şok (şiddətli allergiya) yaradarsa, salonda insanı xilas edəcək reanimasiya avadanlığının və ilk tibbi yardım savadının olmaması qurbanları birbaşa ölümün pəncəsinə itələyir.
Ən acınacaqlı və düşündürücü məqam isə aidiyyəti qurumların, xüsusilə Səhiyyə Nazirliyinin və Analitik Ekspertiza Mərkəzinin bu açıq cinayətə qarşı nümayiş etdirdiyi səssizlik və laqeydlikdir. Zərərçəkmiş qadınların sosial şəbəkələr üzərindən etdikləri kütləvi şikayətlər, fəryadlar və rəsmi müraciətlər nədənsə nəticəsiz qalır. Səhiyyə Nazirliyi bu kimi qondarma həkimlərə elə bir hərəkət sərbəstliyi verib ki, onlar gizlənmək ehtiyacı belə duymur, sosial şəbəkələrdə rəsmi profillər açaraq, böyük büdcəli reklamlarla növbəti qurbanlarını tələyə salırlar.
Azərbaycan qanunvericiliyinə və Cinayət Məcəlləsinin müvafiq maddələrinə görə, xüsusi lisenziya və ali tibbi təhsil olmadan tibbi fəaliyyətlə məşğul olmaq, insanların sağlamlığına qəsdən zərər vurmaq birbaşa cinayət məsuliyyəti yaradır. Lakin ortada heç bir ciddi monitorinq, cəza və nəzarət mexanizmi yoxdur. Səhiyyə Nazirliyinin bu qanunsuz fəaliyyətlərə göz yumması, diplomsuz kosmetoloqların və lisenziyasız salonların şəbəkələşərək insan sağlamlığını və pullarını talamağına şərait yaradır. Vətəndaşların sağlamlığını qorumalı olan rəsmi qurumlar artıq bu özbaşınalığa son qoymalı, sosial şəbəkələrdəki saxta tibbi reklamları qadağan etməli və insanları şikəst edən salon mühitindəki bu “cərrahlar” barəsində hüquq-mühafizə orqanları ilə birgə kəskin cəza tədbirləri görməlidir.