Bu gün “Exxon” şirkəti ilə müqavilə bağlanılacaq
Bu gün “Exxon” şirkəti ilə müqavilə bağlanılacaq
Azərbaycanın iqtisadi inkişaf strategiyasında iqtisadiyyatın şaxələndirilməsi, yeni inkişaf istiqamətlərinin müəyyənləşdirilməsi və qeyri-neft sektorunun potensialının artırılması mühüm yer tutur. Bununla yanaşı, ölkənin enerji sektoru, xüsusilə neft və qaz sənayesi, qarşıdakı dövrdə də iqtisadi inkişafın əsas istiqamətlərindən biri olaraq öz əhəmiyyətini qoruyub saxlayacaqdır.
İqtisadiyyatın şaxələndirilməsi istiqamətində həyata keçirilən tədbirlərə baxmayaraq, neft-qaz sektorunun ölkənin iqtisadi inkişafında mühüm rol oynamaqda davam etməsi Azərbaycanın mövcud enerji potensialından səmərəli istifadə edilməsini, yeni yataqların öyrənilməsini və hasilat imkanlarının genişləndirilməsini zəruri edir. Bu yanaşma enerji resurslarından səmərəli istifadənin təmin olunması ilə yanaşı, ölkənin enerji təhlükəsizliyinin və ixrac potensialının daha da gücləndirilməsinə xidmət edir. Hazırda iki mühüm müqavilənin imzalanması nəzərdə tutulur. Onlardan biri böyük potensiala malik qeyri-ənənəvi neft və qaz yataqlarının işlənilməsi ilə bağlı “Exxon” şirkəti ilə əməkdaşlığı nəzərdə tutan müqavilədir. Sözügedən sənədin imzalanması Azərbaycanın enerji sektorunda beynəlxalq tərəfdaşlarla əməkdaşlığın genişləndirilməsi, yeni enerji layihələrinin həyata keçirilməsi və mövcud hasilat potensialının inkişaf etdirilməsi baxımından mühüm əhəmiyyət kəsb edir.
Qeyri-ənənəvi neft və qaz ehtiyatlarının öyrənilməsi və işlənilməsi müasir texnologiyaların, qabaqcıl geoloji tədqiqatların və beynəlxalq təcrübənin tətbiqini tələb edir. Bu baxımdan, dünyanın aparıcı enerji şirkətlərindən biri ilə əməkdaşlıq Azərbaycanda mövcud potensialın daha ətraflı araşdırılmasına və hasilat imkanlarının müəyyənləşdirilməsinə şərait yarada bilər.
Yeni yataqların kəşf edilməsi və onların kommersiya baxımından səmərəli hesab olunması halında, bu layihələr Azərbaycanın enerji sektorunda əlavə istehsal imkanlarının yaranmasına səbəb ola bilər. Kəşfiyyat işləri uğurla nəticələnsə, bu, Azərbaycanda daha bir neft və qaz bumuna gətirib çıxara bilər. Bununla belə, belə nəticənin formalaşması ilk növbədə aparılacaq geoloji-kəşfiyyat işlərinin nəticələrindən və yataqların iqtisadi səmərəliliyindən asılı olacaqdır.
Eyni zamanda, enerji sektorunda beynəlxalq şirkətlərlə əməkdaşlığın genişləndirilməsi Azərbaycanın investisiya mühitinə olan marağın qorunmasına və yeni texnologiyaların ölkəyə cəlb edilməsinə imkan yaradır. Bu cür layihələr yalnız hasilatın artırılması baxımından deyil, həm də müasir texniki və idarəetmə təcrübəsinin tətbiqi, yerli mütəxəssislərin bilik və bacarıqlarının artırılması və enerji sənayesinin texnoloji imkanlarının genişləndirilməsi baxımından əhəmiyyətlidir.
Beləliklə, iqtisadiyyatın şaxələndirilməsi istiqamətində görülən işlərə baxmayaraq, neft və qaz sektoru Azərbaycanın iqtisadi və enerji sistemində mühüm rol oynamaqda davam edir. “Exxon” şirkəti ilə qeyri-ənənəvi neft və qaz yataqlarının işlənilməsi üzrə müqavilənin imzalanması isə bu sahədə yeni imkanların araşdırılması baxımından mühüm mərhələdir.
Dilarə Məmmədova- Zərdab şəhər 2 saylı körpələr evi-uşaq bağçasının müdiri