Haqqımızda Reklam Əlaqə
160×600
160×600

Ağdam yenidən öz sakinlərinə qovuşur

22 Noyabr 2026, 20:01 Cəmiyyət
728×90

Ağdam yenidən öz sakinlərinə qovuşur

 

Ağdamda məskunlaşan 8300 nəfər təkcə statistik göstərici deyil. Bu rəqəmin arxasında minlərlə insanın həyat hekayəsi, uzun illər davam edən yurd həsrəti, ailələrin qayıdış sevinci və yeni gələcəyə olan inamı dayanır. Hər bir ailənin doğma evinə qayıtması, hər bir uşağın öz kəndində və ya şəhərində böyüməsi, hər bir sakinin öz torpağında əmək fəaliyyəti ilə məşğul olması Ağdamın dirçəlişinə verilən töhfədir.

Bu gün Ağdamın küçələrində və kəndlərində yenidən həyatın canlanması, ailələrin öz evlərində məskunlaşması, uşaqların təhsil alması və insanların gündəlik həyatlarını doğma torpaqlarında davam etdirməsi illərlə gözlənilən arzunun reallığa çevrildiyini göstərir. Vaxtilə boş qalmış, dağıdılmış ərazilərdə indi yeni yaşayış məntəqələri formalaşır, insanların səsi, uşaqların gülüşü eşidilir.

Əlbəttə, Ağdamın tam bərpası uzunmüddətli və mərhələli prosesdir. Qarşıda şəhərin və kəndlərin daha da inkişaf etdirilməsi, yeni yaşayış sahələrinin salınması, iqtisadi fəaliyyətin genişləndirilməsi və əhalinin sosial rifahının yüksəldilməsi kimi mühüm vəzifələr dayanır. Lakin indiyədək əldə olunan nəticələr bu istiqamətdə ardıcıl işlərin aparıldığını və doğma torpaqlara qayıdışın genişləndiyini göstərir.

2026-cı ilin noyabr ayına olan məlumata əsasən, Ağdam şəhəri, Xıdırlı, Kəngərli və Sarıcalı kəndlərində ümumilikdə 2146 ailənin, 8300 nəfərin məskunlaşması rayonun həyatında yeni mərhələnin başlanğıcıdır. Bu rəqəmlər doğma yurda qayıdışın miqyasını, görülən quruculuq işlərinin əhəmiyyətini və insanların öz torpaqlarında yeni həyat qurmaq istəyini əks etdirir.

Ağdam bu gün yalnız yenidən tikilən şəhər və kəndlərdən ibarət deyil. Ağdam insanların qayıdan ümidlərinin, bərpa olunan ailə ocaqlarının, yenidən canlanan kənd həyatının və gələcəyə inamın rəmzidir. İllərlə həsrətlə gözlənilən qayıdış artıq minlərlə insan üçün gerçəyə çevrilib. Bu prosesin davam etməsi ilə Ağdamın bütün yaşayış məntəqələrində həyatın bərpası, rayonun iqtisadi və sosial inkişafının daha da sürətlənməsi gözlənilir.

Ən əsası, Ağdam yenidən öz sakinlərinə qovuşur. İnsanlar doğma torpaqlarında yaşayır, öz gələcəklərini burada qurur, övladlarını ata-baba yurdlarında böyüdürlər. Bu gün Ağdamda görülən işlər və əldə olunan məskunlaşma göstəriciləri Böyük Qayıdışın real nəticələrini əks etdirir. Ağdamda həyat yenidən başlayıb və bu həyat gələcək nəsillər üçün daha abad, müasir və inkişaf etmiş bir yurdun əsasını qoyur.

 

 

 

 

Fazil Kərimov – Zərdab rayonu, İsaqbağı kənd sakini, təqaüddə olan müəllim

728×90
Paylaş: