ZƏFƏR XALQIMIZIN BİRLİYİNİN TƏNTƏNƏSİDİR
ZƏFƏR XALQIMIZIN BİRLİYİNİN TƏNTƏNƏSİDİR
Azərbaycanın müstəqillik tarixinin ən mühüm nailiyyətlərindən biri ölkəmizin ərazi bütövlüyünün və suverenliyinin bərpasıdır. Uzun illər ərzində işğal altında qalmış torpaqlarımızın azad edilməsi dövlətimizin qarşısında duran ən mühüm milli vəzifə idi. Azərbaycan bu məqsədə çatmaq üçün bütün sahələrdə güclənməyi, iqtisadi imkanlarını artırmağı, beynəlxalq əlaqələrini genişləndirməyi və müdafiə qabiliyyətini yüksəltməyi əsas prioritetlərdən biri kimi müəyyənləşdirmişdi. 44 günlük Vətən müharibəsində əldə edilən tarixi nəticə Azərbaycanın uzun illər ərzində apardığı siyasətin və hazırlıq prosesinin uğurlu yekunu oldu. Bu müharibə bir daha göstərdi ki, müstəqil dövlətin ən böyük dayağı güclü iqtisadiyyat, peşəkar ordu, milli birlik və xalqın öz rəhbərliyinə inamıdır. Azərbaycan cəmiyyəti həmin günlərdə siyasi baxışlarından və sosial vəziyyətindən asılı olmayaraq vahid məqsəd ətrafında birləşdi. Bu həmrəylik milli tariximizin ən dəyərli səhifələrindən biri kimi yadda qaldı. Zəfər Günü həm də Azərbaycanın beynəlxalq münasibətlər sistemində mövqeyinin möhkəmlənməsi baxımından əlamətdardır. Ölkəmiz öz milli maraqlarını müdafiə etmək, beynəlxalq hüquqa əsaslanan mövqeyini qorumaq və regionda davamlı sülhün təmin olunmasına töhfə vermək əzmini nümayiş etdirdi. Bu gün Azərbaycan Cənubi Qafqazda yeni siyasi və iqtisadi reallıqların formalaşmasında mühüm rol oynayan dövlətlərdən biridir. Zəfərin əhəmiyyəti yalnız hərbi və siyasi nəticələrlə məhdudlaşmır. Bu qələbə Azərbaycan xalqının mənəvi dünyasında da böyük dəyişiklik yaratdı. Uzun illər doğma yurd həsrəti ilə yaşayan insanların qayıdış ümidi gerçəyə çevrilməyə başladı. Qarabağda yenidən qurulan yaşayış məntəqələri, açılan məktəblər, salınan yollar və bərpa edilən tarixi məkanlar qələbənin gündəlik həyatımızda təcəssümüdür.
Bu torpaqlarda həyatın yenidən qurulması xalqımızın gələcəyə olan inamını daha da artırır. Qarabağın dirçəlişi Azərbaycanın gələcək iqtisadi inkişafı üçün də geniş imkanlar yaradır. Bölgənin kənd təsərrüfatı, turizm, sənaye, energetika və nəqliyyat potensialından səmərəli istifadə ölkə iqtisadiyyatının şaxələndirilməsinə xidmət edir. Yeni infrastruktur layihələri Qarabağ və Şərqi Zəngəzurun ölkənin digər bölgələri ilə iqtisadi əlaqələrini gücləndirir. Beləliklə, Zəfərdən sonra başlanan quruculuq prosesi Azərbaycanın uzunmüddətli inkişaf strategiyasının mühüm hissəsinə çevrilir. Bu tarixi günün digər mühüm tərəfi şəhidlərimizin xatirəsinin yaşadılması və qazilərimizə göstərilən diqqətdir. Onların fədakarlığı Azərbaycan xalqının heç vaxt unutmayacağı müqəddəs dəyərdir. Vətən uğrunda canından keçən insanların xatirəsinə ən böyük ehtiram güclü, inkişaf etmiş və təhlükəsiz Azərbaycan qurmaqdır. Zəfər Gününün gələcək nəsillər üçün daşıdığı məna da olduqca böyükdür. Gənclərimiz bu tarixi yalnız keçmişdə baş vermiş hərbi hadisə kimi deyil, milli iradənin, məsuliyyətin, vətənpərvərliyin və dövlətə bağlılığın nümunəsi kimi dərk etməlidirlər. Çünki əldə olunan nailiyyətlərin qorunması, ölkəmizin daha da inkişaf etdirilməsi hər bir vətəndaşın üzərinə düşən məsuliyyətdir. 8 Noyabr Azərbaycan xalqının öz gücünə inamının, milli qürurunun və gələcəyə böyük ümidlərinin ifadəsidir. Bu tarix bir daha sübut etdi ki, xalqın birliyi və dövlətin qətiyyəti ən böyük hədəflərə çatmağın əsas şərtidir. Zəfərimiz tariximizdə əbədi yaşayacaq, bu qələbənin yaratdığı milli qürur isə gələcək nəsillərə ötürüləcəkdir. Prezident, Müzəffər Ali Baş Komandan cənab İlham Əliyevin rəhbərliyi ilə Azərbaycan bundan sonra da güclənəcək, dövlət suverenliyimiz və müstəqilliyimiz daha da möhkəmlənəcək. Xalqımızın Dəmir yumruğu milli birliyimizin, dövlətçiliyimizin və təhlükəsizliyimizin rəmzi olaraq daim möhkəm qalacaq. Zəfər bizim qürurumuz, dövlətçiliyimizin gücü, gələcək nəsillərə ən böyük tarixi mirasımızdır!
Yeni Azərbaycan Partiyası
Saatlı rayon təşkilatının sədr müavini
Sevinc Gülüşova