Eyni dildə sevmək: Niyə bəzən sevdiyimiz insan bizi anlamır?

Faktum.az xəbər verir ki, uzunmüddətli münasibətlərdə tərəflərin bir-birini səmimi şəkildə sevməsinə baxmayaraq, tez-tez “meni anlamır” və ya “sevgimi hiss etmir” kimi gileylərlə qarşılaşırıq. Psixologiyada bu halın əsas səbəbi tərəflərin sevgini ifadə etmə və qəbul etmə üsullarının, yəni “sevgi dillərinin” fərqli olması ilə izah edilir.

Amerikalı psixoloq Qəri Çapmanın (Gary Chapman) məşhur “5 Sevgi Dili” nəzəriyyəsinə əsasən, hər bir fərd sevgini özünəməxsus emosional kodlarla yaşayır və qarşı tərəfdən də eyni qarşılığı gözləyir.

Çapmanın nəzəriyyəsinə görə, insanların sevgini təzahür etdirmək üçün istifadə etdiyi 5 ana dil mövcuddur: tərif sözləri (xoş sözlər, dəstək və minnətdarlıq), keyfiyyətli zaman (diqqəti tam olaraq tərəf-müqabilinə yönəltmək, birlikdə vaxt keçirmək), hədiyyələr (diqqət və qayğının maddi rəmzi), xidmət addımları (həyatı asanlaşdıran köməklik göstərmək) və fiziki təmas (sarılmaq, əl tutmaq və yaxınlıq). Anlaşılmazlıqlar məhz tərəflərin fərqli dillərdə “danışdığı” zaman yaranır. Məsələn, sevgi dili “xidmət” olan bir şəxs partneri üçün yemək hazırlayaraq və ya ev işlərinə kömək edərək sevgisini göstərdiyi halda, sevgi dili “tərif sözləri” olan partner bunu sadəcə vəzifə kimi görə bilər və xoş sözlər duymadığı üçün özünü sevilməmiş hiss edər.

Münasibətləri qorumaq vən emosional bağı möhkəmləndirmək üçün ilk növbədə həm özümüzün, həm də partnerimizin əsas sevgi dilini müəyyən etmək lazımdır. Sevgini yalnız öz öyrəşdiyimiz üsulla deyil, qarşı tərəfin anladığı emosional dildə təqdim etmək qarşılıqlı məmnunluğu kəskin şəkildə artırır. Şəxsi gözləntiləri açıq şəkildə ifadə etmək, partnerin kiçik diqqət addımlarını qiymətləndirmək və emosional ehtiyaclara qarşı həssas olmaq uzunmüddətli, sağlam və harmonik bir münasibətin ən etibarlı təməlidir.