Məhkəmə qərarı icra olunmursa, nə etməli?

Faktum.az xəbər verir ki, məhkəmə qətnamələrinin çıxarılması qədər onların vaxtında və tam icra edilməsi də ədalət mühakiməsinin ən mühüm mərhələlərindən biridir. Təcrübədə tez-tez rast gəlinən hallardan biri qərarın qanuni qüvvəyə minməsinə baxmayaraq, borclu tərəfindən onun icrasından müxtəlif yollarla boyun qaçırılmasıdır. Belə vəziyyətlərdə hüququ pozulmuş şəxs, yəni tələbkar ilk növbədə qərarı çıxaran məhkəmədən icra vərəqəsi almalı və onu icra olunması üçün aidiyyəti üzrə Ədliyyə Nazirliyinin yerli icra şöbəsinə təqdim etməlidir. İcra məmuru sənədi icraata götürdükdən sonra borcluya qərarın könüllü icrası üçün qanunla müəyyən edilmiş qaydada 10 günədək vaxt verir. Əgər bu müddət ərzində qərar könüllü şəkildə yerinə yetirilməzsə, qanunvericiliyə uyğun olaraq məcburi icra tədbirlərinə başlanılır.

Məcburi icra tədbirləri çərçivəsində icra məmuru borclunun bank hesablarına həbs qoya, əməkhaqqından tutulmalar edə, daşınar və daşınmaz əmlakını siyahıya alaraq məcburi qaydada yönəldə bilər. Həmçinin, zərurət yarandıqda qanunvericiliyin tələblərinə uyğun olaraq borclunun ölkədən getmək hüququna müvəqqəti məhdudiyyət tətbiq edilməsi mümkündür. Bəzən isə vətəndaşlar icra prosesinin ləngiməsindən və ya icra məmurlarının hərəkətsizliyindən şikayətçi olurlar. Belə hallarda tələbkar icra məmurunun hərəkətlərindən Ədliyyə Nazirliyinin İcra Baş İdarəsinə və ya birbaşa inzibati qaydada məhkəməyə şikayət etmək hüququna malikdir. Məhkəmə qərarının qərəzli şəkildə icra edilməməsi isə yalnız mülki məcburiyyət tədbirləri ilə yekunlaşmır, eyni zamanda ağır hüquqi nəticələr doğurur. Azərbaycan Respublikası Cinayət Məcəlləsinin 306-cı maddəsinə əsasən, qanuni qüvvəyə minmiş məhkəmə qərarını, hökmünü və ya qərardadını qərəzli olaraq icra etməmə, yaxud onun icrasına mane olma cinayət əməli hesab olunur və bu qanunsuzluğa yol verən şəxslər cərimə, ictimai işlər, hətta azadlıqdan məhrumetmə cəzası ilə üzləşə bilərlər.