Gələcəyin ən böyük təhlükəsi: Qlobal Qocalma və demoqrafik böhran

Faktum.az xəbər verir ki, dünya əhalisinin sürətlə qocalması və doğum göstəricilərinin kəskin şəkildə düşməsi bəşəriyyəti yaxın gələcəkdə misli görünməmiş demoqrafik böhranla üz-üzə qoyur.

Birləşmiş Millətlər Təşkilatının (BMT) və qlobal tədqiqat mərkəzlərinin hesabatlarına əsasən, Avropa, Şərqi Asiya və Şimali Amerika ölkələri başda olmaqla, dünyada nəsil dəyişməsini təmin edən minimum doğum həddi (hər qadına 2.1 uşaq) sürətlə azalır.

Yaponiya, Cənubi Koreya, İtaliya və Almaniya kimi inkişaf etmiş dövlətlərdə qocalan əhalinin nisbəti gəncləri üstələyərək əmək bazarında ciddi işçi qüvvəsi çatışmazlığı yaradır. İşçi qüvvəsinin daralması, təqaüd və səhiyyə sistemlərinə düşən maliyyə yükünün artması qlobal iqtisadiyyatın artım tempini tormozlayır.

Sosial-iqtisadi şəraitin dəyişməsi, təhsil və karyera imkanlarının ön plana keçməsi, yaşayış xərclərinin artması kimi amillər gənc ailələrin uşaq sahibi olmaq qərarına birbaşa təsir edir. Bu tendensiya qarşısı alınmazsa, XXI əsrin ikinci yarısında bir çox ölkənin əhalisinin kəskin azalması və cəmiyyətlərin struktur baxımından tamamilə dəyişməsi qaçılmaz olacaq.