Beynəlxalq İşarət Dilləri Günü: Eşitmə Məhdudiyyətli Şəxslərin Mədəni İrsi

Hər il sentyabrın 23-də qeyd olunan Beynəlxalq İşarət Dilləri Günü, Birləşmiş Millətlər Təşkilatı (BMT) Baş Assambleyası tərəfindən kar və eşitmə məhdudiyyətli insanların dil identikliyini, linqvistik müxtəlifliyini və insan hüquqlarını qorumaq məqsədilə təsis edilmişdir.

Faktum.az xəbər verir ki, bu tarixin seçilməsi təsadüfi deyildir; 1951-ci il sentyabrın 23-də Dünya Kar İnsanlar Federasiyası (WFD) yaradılmışdır. Günümüzdə dünyada 70 milyondan çox kar insan yaşayır və onlar ümumilikdə 300-dən çox fərqli işarət dilindən istifadə edirlər. İşarət dilləri şifahi dillərin sadəcə mimik təzahürü deyil, öz qrammatik quruluşuna və strukturuna malik tamdəyərli təbii dillərdir. BMT bu əlamətdar gün vasitəsilə milli işarət dillərinin rəsmi status almasını, təhsildə və ictimai xidmətlərdə tətbiqini təşviq edərək inklyuziv cəmiyyətin formalaşmasına töhfə verir.