Ağız boşluğunda diş çöpü (kürdan) istifadəsinin tibbi zərərləri

Faktum.az xəbər verir ki, yeməkdən sonra diş aralarında qalan qida qalıqlarını təmizləmək üçün taxta və ya plastik diş çöplərindən (kürdan) istifadə etmək cəmiyyətimizdə geniş yayılmış vərdişlərdən biridir. Lakin stomatoloqlar və ağız boşluğu cərrahları həyəcan təbili çalaraq bildirirlər ki, bu sadə alət əslində diş və diş əti sağlamlığı üçün ciddi zədələyici faktorlardan biridir.

Sərt və iti uclu diş çöplərinin mütəmadi istifadəsi diş əti toxumasını mikroskopik səviyyədə zədələyir. Bu da ilk növbədə diş əti çəkilməsinə (resessiya) və patoloji diş əti ciblərinizin açılmasına səbəb olur. Açılan bu boşluqlara qida qalıqları daha rahat dolur və qan dövranı pozulan diş əti iltihablaşaraq gingivit və periodontit kimi ağır xəstəliklərə zəmin yaradır.

Bununla yanaşı, diş çöpünü diş arasına zorla daxil etdikdə diş emalı mikrozədələr alır və emal qatı tədricən yeyilir. Taxta çöplərin qırılaraq diş əti cibində qalması isə kəskin irinli iltihablara, infeksiyalaşmaya və hətta cərrahi müdaxilə ehtiyacına gətirib çıxarır. Diş ətinin davamlı zədələnməsi nəticəsində diş kökləri açıq qalır, bu da isti-soyuq qidalara karşı kəskin həssaslıq və gələcəkdə sağlam dişlərin yırğalanaraq düşməsi riski yaradır.

Stomatoloqlar vurğulayırlar ki, qida qalıqlarını təmizləmək üçün ən təhlükəsiz və tibbi cəhətdən doğru vasitələr xüsusi diş sapları (floss) və ya ağız irriqatorlarıdır (su ilə təmizləyicilər). Diş çöpləri yalnız təcili və alternativsiz hallarda, diş ətinə toxunmadan çox ehtiyatla istifadə edilə bilər.