Sıfır cazibənin insan bədəninə görünməz təsirləri: Kosmos adaptasiya sindromu nədir?

Faktum.az xəbər verir ki, mikroqravitasiya şəraitində uzun müddət qalan kosmonavtların orqanizmində ciddi və bəzən geri dönməz fiziki dəyişikliklər baş verir. İnsanın kosmos mühitinə uyğunlaşması zamanı ortaya çıxan bu mürəkkəb fizioloji proses elmdə “Kosmos Adaptasiya Sindromu” (Space Adaptation Syndrome) adlanır.

Cazibə qüvvəsinin olmaması səbəbindən fəqərəarası disklər sıxılmır və bu, astronotların boyunun kosmosda 3 ilə 5 santimetrədək uzanmasına gətirib çıxarır. Lakin bu müsbət dəyişiklik kimi görünsə də, Yerdəki cazibəyə qarşı müqavimət göstərməyən sümük və əzələ toxumaları hər ay orta hesabla 1-1,5 faiz sıxlıq itirir.

Eyni zamanda, bədəndəki qan və digər mayelər yuxarı hissəyə – baş və sinə nahiyəsinə doğru yer dəyişdirdiyi üçün ürək lazımi qədər gərgin işləmir, nəticədə zamanla kiçilərək daha kürəvi forma alır. Kosmik agentliklər bu mənfi fəsadların qarşısını almaq üçün astronotlara gündəlik intensiv fiziki məşqlər tətbiq edirlər.