22 Sentyabr – Ümumdünya Avtomobilsiz Günü: Ekoloji Təmizlik və Məsuliyyət Hərəkatı

Hər il sentyabrın 22-də qeyd olunan Ümumdünya Avtomobilsiz Günü (World Car-Free Day) şəxsi avtomobillərin istifadəsini birgünlük məhdudlaşdırmaqla atmosferə atılan zərərli qazların (karbon emissiyasının) həcmini azaltmaq, səs-küy çirklənməsinin və tıxacların qarşısının alınmasına dəstək vermək, eləcə də insanları ictimai nəqliyyat, velosiped və ya piyada gəzinti kimi alternativ gediş-gəliş vasitələrinə yönəltmək məqsədi daşıyır.

Faktum.az xəbər verir ki, bu təşəbbüsün kökləri ilk dəfə 1970-ci illərdəki neft böhranı dövrünə təsadüf etsə də, rəsmi və sistemli hərəkat kimi 1990-cı illərin ortalarında formalaşıb. Şəhərlərdə nəqliyyat sıxlığını azaltmaq və ekoloji tarazlığı bərpa etmək məqsədilə ilk addımlar 1996–1998-ci illərdə Reykyavik (İslandiya), Bat (Böyük Britaniya) və La-Roşel (Fransa) şəhərlərində yerli aksiyalar şəklində atılıb. Fransada başladılan “Şəhərdə mənim avtomobilim olmadan!” kütləvi kampaniyası qısa zamanda digər Avropa ölkələrinə də yayılıb. Təşəbbüsün böyük miqyas alması nəticəsində 2000-ci ildə Avropa Komissiyası 22 sentyabr tarixini rəsmi olaraq “Ümumdünya Avtomobilsiz Günü” elan edib və bu aksiya bütün dünyanı əhatə edən qlobal hərəkata çevrilib.