Teymur Bəkirzadə: Azərbaycan sənədli və bədii kinosunun poetik nəfəsi

Faktum.az xəbər verir ki, 1941-ci il sentyabrın 14-də Azərbaycanın tanınmış kinorejissoru, ssenaristi və Əməkdar incəsənət xadimi Teymur Bəkirzadə anadan olmuşdur. O, milli kinematoqrafiya tarixində xüsusilə sənədli film janrının inkişafına böyük töhfələr vermiş, real həyat lövhələrini yüksək estetik və poetik kadrlarla ekrana köçürən rejissorlardan biri kimi tanınmışdır.

Teymur Bəkirzadə “Azərbaycanfilm” kinostudiyasında fəaliyyət göstərdiyi illər ərzində onlarla sənədli və bədii filmin ərsəyə gəlməsində həlledici rol oynamışdır.

Rejissorun “Gözləmə zalı“, “Cənub buxtası“, “Bakı qalası“, “Abşeron ritmləri” kimi bədii-sənədli lentləri mühitin atmosferini, insan psixologiyasını və Xəzər dənizinin, Abşeronun özünəməxsus koloritini dəqiqliklə əks etdirirdi. Onun filmlərində kadr arxası mətndən ziyadə, vizual dilin və rejissor müşahidəçiliyinin ön plana çıxması Azərbaycan kino sənətinə yeni estetik nəfəs gətirmişdi.

Görkəmli sənətkarın yaradıcılığı ölkə daxilində və beynəlxalq kino festivallarında mükafatlara layiq görülmüş, kinoda müşahidəçi-təsviri məktəbin formalaşmasına təkan vermişdir. 1996-cı ildə dünyasını dəyişən Teymur Bəkirzadənin çəkdiyi filmlər bu gün də Azərbaycan kinosunun qızıl fondunda saxlanılaraq öz bədii-tarixi dəyərini qoruyub saxlayır.