”Marsı unudun, hədəf Titandır”: Kosmosun fəthində humanoid robot inqilabı

Bəzi kosmik qurumlar Marsa insan missiyaları hazırladığı bir vaxtda, dünya alimləri artıq daha uzaqlara – Saturnun ən böyük peyki olan Titana baxırlar. Ötən ay keçirilən ilk “İnsanlardan Titana Zirvə” toplantısında aparıcı elm adamları bu ekzotik səma cisminin tədqiqində insan fəaliyyətinin nə dərəcədə zəruri olduğunu və kosmik genişlənmənin yeni gələcəyini müzakirə ediblər.

SETI və Mars İnstitutunun planetar alimi Paskal Li hesab edir ki, qalın atmosferi, maye karbohidrogenlərdən ibarət çayları və gölləri ilə diqqət çəkən Titan, ulduzlararası səyahətdən əvvəl bəşəriyyətin son böyük sıçrayış nöqtəsi (tramplini) olacaq. Lakin bura insan göndərmək çox uzaq gələcəyin işidir və həmin vaxta qədər kosmik missiyaların forması tamamilə dəyişəcək.

Alimin fikrincə, hazırda Yer kürəsində baş verən süni intellekt və humanoid robot (android) inqilabı dərin kosmosun fəthində həlledici rol oynayacaq. Bioloji məhdudiyyətləri olmayan, qida, hava və yuxuya ehtiyac duymayan, fərqli atmosfer təzyiqlərinə dözümlü bu robotlar 24/7 rejimində işləyərək Titan üzərində ilk infrastrukturu və insan üçün hazır bazaları quracaqlar. İnsan-robot simbiozuna əsaslanan bu yeni modeldə ən təhlükəli və uzunmüddətli missiyaları süni intellekt öz üzərinə götürəcək, insanlar isə elmi liderlik və strateji qərarların verilməsi ilə məşğul olacaqlar. Paskal Li bu sistemin sınaq meydançası kimi Mars mühitinin analoqu sayılan Arktikadakı Devon adasını təklif edir.

Faktum.az